Kasba By Election : राज ठाकरेंच्या मनसेची साथही कसब्यात भाजपला तारू शकली नाही; धंगेकरांनी करून दाखवलं

Kasba Peth Election Result : कसबा मतदारसंघाच्या पोटनिवडणुकीत भाजपला मोठा धक्का बसला आहे. महाविकास आघाडीच्या घटक पक्ष असलेल्या काँग्रेसचे उमेदवार रवींद्र धंगेकर यांचा ऐतिहासीक विजय झाला आहे. तर भाजपचे हेमंत रासने यांचा ११ हजार मतांनी पराभव झाला आहे.

कसबा विधानसभा मतदारसंघावर अनेक वर्ष भाजपचे वर्चस्व होते. तसेच या पोटनिवडणुकीत मनसेने आपला उमेदवार न देता भाजपला पाठिंबा दिला होता. तसेच मनसे भाजपच्या थेट प्रचारात न उतरता मतदानामध्ये मदत करेल, असे आदेशच मनसे अध्यक्ष राज ठाकरे यांनी मनसैनिकांना दिले होते.

तसेच मतदानाच्या आधी एक दिवस मनसे नेते बाळा नांदगावकर यांनीही थेट पुणे गाठत मनसेच्या पादाधिकाऱ्यांची बैठक घेत भाजपला मदत करण्याचे निर्देश दिले होते. एवढं सगळं करूनही राज ठाकरे हे भाजपचा पराभव रोखू शकले नाही.

कसबा पोटनिवडणुकीसाठी अनेकांची प्रतिष्ठा पणाला लागली होती. भाजपच्या दिग्गज नेत्यांनी पुण्यात तळच ठोकला होता. कसब्याच्या प्रचारात मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी देखील लक्ष घातले होते. तसेच प्रचारातही ते सहभागी झाले होते.

मात्र, तरी देखील भाजपचा येथे मोठ्या मताधिक्याने पराभव झाला. दरम्यान, भाजच्या दिग्गज नेत्यांनी कसबा पोटनिवडणुकीच्या पार्श्वभूमीवर पुण्यात थळ ठोकून आणि राज ठाकरेंनी भाजपला पाठिंबा देऊनही भाजपला पराभवाला सामोरं जावं लागलं आहे.