Pune By-Election: निवडणुका तर झाल्या, पण शपथविधी कधी?

Pune By-Election: कसबा विधानसभा मतदारसंघाचे निवनिर्वाचित आमदार रवींद्र धंगेकर आणि चिंचवडच्या आमदार अश्विनी जगताप गुरुवारी (९ मार्च) विधानसभेत सदस्यत्वाची शपथ घेणार आहेत, अशी माहिती समोर आली आहे. २६ फेब्रुवारी २०२३ रोजी कसबा आणि चिंचवड विधानसभेच्या जागांसाठी निवडणूक झाली होती. त्यानंतर २ मार्च रोजी निकाल जाहीर झाले.

महाविकास आघाडीचे रवींद्र धंगेकर यांनी भाजपच्या हेमंत रासनेंचा दणदणीत पराभव केला. कसबा आणि चिंचवड विधानसभा मतदारसंघातील पोटनिवडणुकीकडे संपूर्ण राज्याचे लक्ष लागले होते. या चुरशीच्या निवडणुकीत भाजपकडून मुख्यमंत्री,उपमुख्यमंत्र्यांसह जवळपास डझनभर मंत्री,नेते प्रचारात उतरवले होते. तर काँग्रेस व राष्ट्रवादीकडून देखील माजी मुख्यमंत्री, उपमुख्यमंत्र्यांसह राज्यातील कार्यकर्ते, नेत्यांची फौज उभी केली होती. मात्र, तरीदेखील भाजपचा बालेकिल्ला वा पारंपारिक मतदारसंघ राहिलेल्या पेठांमधील लोक पोटनिवडणुकीत भाजपच्या हेमंत रासनेंऐवजी काँग्रेसच्या रवींद्र धंगेकर यांच्या पाठीशी असल्याचं चित्र स्पष्ट झालं.

तर चिंचवडचा गड राखण्यात भाजपला यश आलं. आमदार लक्ष्मण जगताप यांच्या निधनानंतर महिन्याभरातच चिंचवडची पोटनिवडणूक लागली. त्यानंतर येथे बड्या नेत्यांनी प्रचाराचा धुराळा उडवून राज्याचे लक्ष वेधले. या लक्षवेधी चिंचवड पोटनिवडणुकीत भाजपच्या उमेदवार आणि दिवंगत आमदार लक्ष्मण जगताप यांच्या पत्नी अश्विनी जगताप यांचा दणदणीत विजय झाला. त्यांना एक लाख ३५ हजार ४९४ मते मिळाली, तर दुसऱ्या क्रमांच्या राष्ट्रवादीच्या नाना काटे यांना ९९ हजार ४२४ मते मिळाली.