Ashwini Jagtap Victory : चिंचवडमध्ये भाजपच्या अश्विनी जगताप ३६ हजार मतांनी विजयी

Pune By Election Result : आमदार लक्ष्मण जगताप यांच्या निधनानंतर महिन्यातच चिंचवडची पोटनिवडणूक लागली. त्यानंतर येथे बड्या नेत्यांनी प्रचाराचा धुराळा उडवून राज्याचे लक्ष वेधले. या लक्षवेधी चिंचवड पोटनिवडणुकीत भाजपच्या उमेदवार आणि दिवंगत आमदार लक्ष्मण जगताप यांच्या पत्नी अश्विनी जगताप यांचा दणदणीत विजय झाला आहे. त्यांना एक लाख ३५ हजार ४९४ मते मिळाली, तर दुसऱ्या क्रमांच्या राष्ट्रवादीच्या नाना काटे यांना ९९ हजार ४२४ मते मिळाली. यात जगताप यांचा ३६ हजार ७० मतांनी विजय झाला आहे. तिसऱ्या स्थानावरील अपक्ष राहुल कलाटे यांना ४० हजार ७५ मते मिळालेली आहेत.

भाजप आणि महाविकास आघाडीतील नेत्यांनी चिंचवड (Chinchwad) आणि कसब्याची पोटनिवडणूक प्रतिष्ठेची केली होती. कसब्यात महाविकास आघाडीतील काँग्रेसचे रवींद्र धंगेकर तर चिंचवडमध्ये भाजपच्या अश्विनी जगताप (Ashwini Jagtap) विजयी झाल्या आहेत. चिंचवडमध्ये पाच लाख ६८ हजार ९५४ मतदार आहेत. त्यातील दोन लाख ८७ हजार ४७९ जणांनी आपला मतदानाचा हक्क बजावला. येथे ५०.४७ टक्के मतदान झाले.

या मतमोजणीसाठी ३७ फेऱ्या पार पडल्या. या निवडणुकीत पहिल्यापासूनच अश्विनी जगताप यांचा वरचष्मा पहायला मिळाला. त्यांनी पहिल्या फेरीपासून मतांची आघाडी घेतली होती. २८ व्या फेरीत त्यांनी एक लाख मतांचा टप्पा पार केला होता. उरलेल्या फेऱ्यांतही आपणच आघाडी घेऊ असा विश्वासही त्यांनी व्यक्त केला होता. त्यानुसार अखेरच्या फेरीपर्यंत त्यांनी आघाडी राखली. त्या ३६ हजार ७० मतांनी विजयी झाल्या आहेत.

दरम्यान, चिंचवडमधील महाविकास आघाडीतील बंडखोरी भाजपच्या पथ्यावर पडल्याची चर्चा राजकीय वर्तुळातून होत आहे. येथे राष्ट्रवादीचे काटे यांना ९९ हजार ४२४ मते अपक्ष कलाटे यांना ४० हजार ७५ मते मिळाली. त्यांच्या मतांची बेरीज एक लाख ३९ हजार ४९९ इतकी होत आहे. कलाटे यांनी बंडखोरी केली नसती तर येथेही महाविकास आघाडीचा विजय झाला असता, असे प्रतिपादन राष्ट्रवादीचे नेते, विरोधी पक्षनेते अजित पवार यांनी केले आहे.