Haveli Bazar Samiti Result : हवेलीत राष्ट्रवादी-भाजपत काँटे टक्कर : दोघांना दोन जागा; अजितदादांच्या कट्टर समर्थकाचा धक्कादायक पराभव

पुणे : निवडणुकीच्या पहिल्या दिवसापासून राज्याचे लक्ष लागलेल्या हवेली (Haveli) कृषी उत्पन्न बाजार समिती (Bazar Samit) निवडणुकीचा पहिल्या टप्प्यातील निकाल जाहीर झाला आहे. बाजार समितीच्या ग्रामपंचायत गटातून राष्ट्रवादी (NCP) काँग्रेस पुरस्कृत अण्णासाहेब मगर सहकार पॅनलचे रामकृष्ण सातव (सर्वसाधारण गट) व आबासाहेब आबनावे (अनुसूचित जाती जमाती गट) तर भाजप (BJP) पुरस्कृत अण्णासाहेब मगर सहकार आघाडीचे रवींद्र कंद (आर्थिक दुर्बल घटक) आणि सुदर्शन चौधरी (सर्वसाधारण गट) विजयी झाले आहेत. (BJP and NCP win two seats each in Haveli Bazar Samiti)

विरोधी पक्षनेते अजित पवार यांचे खंदे समर्थक आणि महाराष्ट्र केसरी राहुल काळभोर यांचा धक्कादायक पराभव झाला आहे. जिल्हा परिषदेचे माजी उपाध्यक्ष शुक्राचार्य वांजळे यांनाही पराभवाचा सामना करावा लागला आहे.

राष्ट्रवादी पुरस्कृत अण्णासाहेब मगर पॅनेलचे रामकृष्ण सातव यांना ४०५ मते मिळाली आहेत, आबासाहेब आबनावे हे ३०७ मते घेऊन विजयी झाले आहेत, तर भाजपचे सुदर्शन चौधरी यांना २५८ मते मिळाली आहेत. याशिवाय रवींद्र कंद हे ३७५ मते घेत विजयश्री खेचून आणली आहे. विजयानंतर कार्यकर्त्यांनी फटाक्यांची आतषबाजी करून आनंद व्यक्त केला. पराभूत उमेदवार राहुल काळभोर यांना २३६, तर जिल्हा परिषदेचे माजी उपाध्यक्ष शुक्राचार्य वांजळे यांना २११ मते मिळाली आहेत.

हवेली कृषी उत्पन्न बाजार समितीच्या पंचवार्षिक निवडणुकीत हमाल मापाडी मतदार संघाचा पहिला निकाल जाहीर झाला आहे. संतोष नांगरे यांनी ८८८ मते मिळवून आपल्या विजयाची शिट्टी वाजवली आहे. त्यांनी या मतदार संघातून राजेंद्र चोरघे ४०३, गोरख मेंगडे ३१४, संजय उंद्रे ८, गोपाळ दसवडकर ३ यांना मोठ्या मतांच्या फरकाने पराभूत केले आहे.

हमाल मापाडी या मतदार संघात एका जागेसाठी पाच उमेदवार रिंगणात होते. त्यासाठी एकूण २ हजार ७ पैकी १ हजार ८०२ इतके मतदान झाले. त्यापैकी १ हजार ६१६ मते वैध ठरली आहेत.