Kasba By-Election : कसबा-चिंचवडमध्ये तुम लढो, हम 'मनसे' कपडे संभालते है !

ज्ञानेश्वर हिंगोलीकर

Chinchwad and Kasba By-Election : कसबा आणि चिंचवडची पोटनिवडणूक ही भाजप आणि महाविकास आघाडीसाठी प्रतिष्ठेची बनली आहे. असे असतानाच मनसेने कसबा आणि चिंचवड पोटनिवडणुकीत भाजपला मदत करणार असल्याचे घोषित केले आहे.

मनसेचे नेते बाबू वागसकर यांनी ही माहिती दिली असून चिंचवड आणि कसबा या दोन्ही ठिकाणी मनसेची हीच भूमिका राहणार आहे.

या पोटनिवडणुकीमध्ये भाजपच्या प्रचारात मनसे सहभागी होणार नाही. मात्र, मनसे मतदानामध्ये भाजपला मदत करणार असल्याची चर्चा मनसे आणि भाजपच्या वरिष्ठ स्तरावर झाली आहे. तसेच या निवडणुकीमध्ये भाजपला मदत करण्याचा आदेश मनसे अध्यक्ष राज ठाकरे (Raj Thackeray) यांनी दिला असल्याची माहिती मनसेच्या नेत्यांनी दिली.

भारतीय जनता पक्षाचे निवडणूक प्रभारी मुरलीधर मोहोळ आणि कसबा विधानसभा मतदारसंघाच्या निवडणूक प्रमुख आमदार माधुरी मिसाळ यांनी आज मनसे कार्यालयात शिदोरे आणि वागसकर यांची भेट घेतली. त्यानंतर मनसेच्यावतीने बाबू वागसकर यांनी ही पाठिंबा देण्याची भूमिका स्पष्ट केली. पक्षाच्या वरिष्ठ पातळीवर या संदर्भात निर्णय झाल्याचे त्यांनी स्पष्ट केले.

दरम्यान, या निवडणुकीत मनसे भारतीय जनता पक्षाबरोबर प्रत्यक्ष प्रचारात सहभागी होणार नाही. मात्र, मतदानाच्या पातळीवर भाजप उमेदवार हेमंत रासने यांना संपूर्ण पाठिंबा देणार असल्याचे जाहीर केले आहे.

कसबा-चिंचवड पोटनिवडणुकीमध्ये भाजपच्या प्रचारात मनसे सहभागी होणार नाही. मात्र, थेट मतदानामध्ये मदत करणार अशी भूमिका मनेसेने घेतल्यामुळे ''तुम लढो, हम 'मनसे' कपडे संभालते है !'' अशी गत मनसेची झाली आहे.