सरकारनामा ब्यूरो
पुणे : उपमुख्यमंत्री अजित पवार यांच्याशी संबंधित कंपन्या व त्यांच्या नातेवाईकांच्या कंपन्यांवर आयकर खात्याने छापे टाकल्याच्या निषेधार्थ आंदोलन करणाऱ्या शहर राष्ट्रवादी कॉंग्रेसच्या पदाधिकारी व कार्यकर्त्यांना निदर्शने न करण्याचा सल्ला अजित पवार यांनी दिला. आपण कायद्याचे पालन करणारे लोक आहोत. त्यामुळे अशी निदर्शने करू नका असे पवार यांनी या कार्यकर्त्यांना सांगितले.
गुरूवारी सकाळपासून मंबई, पुणे व कोल्हापुरातील अजित पवार तसेच त्यांच्या नातेवाईकांच्या कंपन्यांच्या कार्यालयावर आयकर खात्याच्या आधिकाऱ्यांनी छापे टाकत कागदपत्रांची तपासणी सुरू केली. या छाप्यांचे हे सत्र आजही सुरूच होते. त्यामुळे संतापलेल्या पुण्यातील पक्षाच्या कार्यकर्त्यांनी शहराध्यक्ष प्रशांत जगताप यांच्या नेतृत्वाखाली कौन्सिल हॉलसमोर निदर्शने केली. बैठक संपवून बाहेर येताना पवार यांनी या कार्यकर्त्यांची भेट घेत अशी आंदोलन करू नका, असे आवाहन केले.
ते म्हणाले, ‘‘ आपण कायद्याचे पालकन करणारे लोक आहोत. त्यामुळे चौकशी करणाऱ्या यंत्रणांना त्यांचे काम करू द्या. त्यांच्या कामात अडथळा येणार नाही, याची काळजी आपण घ्यायला हवी. चौकशीचे काम पूर्ण झाल्यानंतर यावर काय बोलायचे ते मी सविस्तर बोलणार आहे. या संदर्भात करण्यात येत असलेल्या सर्व आरोपांना आपण उत्तर देऊ. अगदी जरंडेश्‍वर कारखान्याच्या मालकीबद्दल प्रश्‍न विचारण्यात येत आहेत. त्याचेही उत्तर आपण देऊ ’’
केवळ राजकीय सूडापोटी कारवाई करण्यात येत आहे. बदनामी करण्यासाठी छापे टाकण्यात येत आहेत. या संदर्भात कार्यकर्त्यांच्या भावना तीव्र होत्या. त्यामुळे केंद्र सरकारच्या या कृतीचा निषेध करण्यासाठी पक्षाच्यावतीने निदर्शने करण्यात आल्याचे शहराध्यक्ष प्रशांत जगताप यांनी सांगितले.
Edited By : Umesh Ghongade
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
