अजबच; वीज मीटर बंद करण्यासाठीही मागितली लाच; अभियंता एसीबीच्या जाळ्यात

Pimpri-Chinchwad : पिंपरी : वीजजोड घेण्यासाठी लाच मागितली, तर समजू शकतो. तसा प्रकार यापूर्वी घडलेलाही आहे. पण, वीजजोड बंद करण्याकरिताही लाच मागितल्याचा धक्कादायक प्रकार पिंपरी-चिंचवडमध्ये (Pimpri-Chinchwad) घडला आहे. भोसरी एमआयडीसीतील एका कंपनीतील वीजमीटरचे कनेक्शन बंद करण्यासाठी 'महावितरण'च्या कनिष्ठ अभियंत्याने पन्नास हजार रुपये लाच म्हणून मागितल्याचा प्रकार समोर आला आहे. त्याबद्दल लाचखोरीचा गुन्हा दाखल करून या अभियंत्याला पुणे लाचलुचपत प्रतिबंधक विभागाने (ACB) आज ताब्यात घेतले.

संतोषकुमार बाळासाहेब गित्ते (वय ३१) असे या लाचखोराचे नाव आहे. ते महावितरणच्या भोसरी उपविभाग कार्यालयात कनिष्ठ अभियंता म्हणजे ज्युनिअर इंजिनिअर म्हणून तो काम करीत आहे. या घटनेतील तक्रारदाराने आपल्या कंपनीतील वीज मीटर कनेक्शन बंद करण्यासाठी अर्ज केला होता. त्यावर कार्यवाही करण्याकरिता गित्ते याने पन्नास हजार रुपयांची लाच या कंपनी मालकाकडे मागितली. मात्र, त्यांना ती द्यायची नव्हती. म्हणून त्यांनी त्याबाबत `एसीबी`कडे तक्रार केली.

त्यांनी त्याची एकदा नाही, तर तीनदा खात्री केली अन् अखेरीस आज भोसरी एमआयडीसी पोलिस ठाण्यात गित्तेविरुद्ध लाचखोरीचा गुन्हा दाखल करून त्याला ताब्यातही घेतले. एसीबीचे पीआय वीरनाथ माने पुढील तपास करीत आहेत. अशाप्रकारे शासकीय कामासाठी कोणी लाच मागत असेल, तर १०६४ या टोल फ्री नंबरवर संपर्क साधण्याचे आवाहन `एसीबी`ने केले आहे.

लाच मागितल्याचा या महिन्यातील पिंपरी-चिंचवडमधील दुसरा गुन्हा आहे. या दोन्ही घटनांतील तक्रारदार तरुणच आहेत. ३ तारखेला पिंपरी-चिंचवड महापालिकेच्या नगररचना व विकास विभागातील सर्व्हेअर संदीप फकीरा लबडे (वय ४८) याने तीन लाख रुपये लाच मागितली म्हणून एसीबीने त्याला अटक केली होती. पालिका आयुक्त राजेश पाटील यांनी नंतर लबडेला निलंबित करून त्याची खातेनिहाय चौकशी सुरु केली आहे. लबडेने एका तरुणाच्या कंपनीला विकास योजना अभिप्राय देण्यासाठी साडेतीन लाख रुपये लाच मागून नंतर तीन लाख रुपयांवर तडजोड केली होती‌.