Pune News : लाचेचा नवा पॅटर्न ; थेट फोन पे तून 'हफ्ता' घेतला अन् एसीबीने घेतलं ताब्यात!

Pune News : रोख पद्धती बरोबरच वस्तूच्या स्वरूपातही लाच घेतल्याच्या घटना आतापर्यंत घडलेल्या आहेत. आता मात्र, त्यात 'नव्या पॅटर्न'ची भर पडली आहे. फोन पे व्दारे लाच घेतल्याची अजब घटना आज (ता.१३) पुण्यात घडली. यामुळे आता डिजिटल लाच पद्धत प्रककण पुढे येत आहे. (Latest Marathi News)

शिवाजीनगर, पुणे येथील जिल्हा उद्योग केंद्रातील उद्योग निरीक्षक चंद्रभान परशुराम गोहाड (वय ५७) असे डिजिटली फोन पे च्या माध्यमातून लाच घेतल्याचे निरीक्षकाचे नाव आहे. घेणाऱ्या जुन्या वर्ग तीन कर्मचाऱ्याचे नाव आहे. वर्षभरातच ते रिटायर होणार होते. लाचलुचपत प्रतिबंधक विभागाच्या (एसीबी) पुणे युनिटने आता त्यांना या लाच प्रकरणी ताब्यात घेतले आहे.

पंतप्रधान रोजगार निर्मिती कार्यक्रमांतर्गत तक्रारदार तरुणाने खिळे निर्मिती उद्योगाकरिता पुणे जिल्हा उद्योग केंद्रात अर्ज केला होता.सदरचा प्रस्ताव बॅंकेकडे पाठविण्यासाठी गोहाड यांनी पाच हजार रुपये लाचेची मागणी तक्रारदाराकडे केली. तसेच त्यातील पाचशे रुपयांचा पहिला हफ्ता लगेचच घेतला.

नंतर एक हजार रुपये फोन पे वरून घेतले. तर दोन हजार रुपये घेताना आज त्यांना रंगेहात पकडण्यात आले. एसीबीचे पीआय वीरनाथ माने याप्रकरणी तपास करीत आहेत. दुसरीकडे शिवाजीनगर पोलिस ठाण्यात याबाबत गुन्हा नोंदविण्याचे काम सुरु झाले आहे.