राज ठाकरे यांच्यानंतर कोरोनावरून प्रकाश आंबेडकरांचाही सरकारवर आरोप

औरंगाबाद : सरकार कोरोनावरून लोकांमध्ये विनाकारण भितीचे वातावरण तयार करत आहेत, आपल्याकडील लोकसंख्येच्या तुलनेत संशयित किंवा कोरोना पॉझीटीव्ह रुग्णांची संख्या कमी असल्याचे सांगत वंचित बहुजन आघाडीचे अध्यक्ष प्रकाश आंबेडकर यांनी देखील राज्य सरकार लोकांना भिती दावत असल्याचा आरोप केला आहे. 

मनसे अध्यक्ष राज ठाकरे यांनी औरंगाबाद दौऱ्यात यापुर्वी राज्य सरकार कोरोनाचा बाऊ करत लोकांना पॅनिक करत असल्याचा आरोप केला होता. त्यानंतर आता प्रकाश आंबडेकरांनी देखील याच मुद्यावरून सरकारवर टिका केली आहे.

... तर तुळजाभवानीचे आशीर्वाद घ्यायला तुळजापूरला रेल्वेने येता आले असते - ओमराजे निंबाळकर

भटके विमुक्त आदिवासी परिषदेला संबोधीत करण्यापुर्वी सुभेदारी विश्रामगृह येथे अ‍ॅड. प्रकाश आंबेडकर यांनी पत्रकारांशी संवाद साधला. कोरोनाचा धोका असला तरी घाबरून जाण्याइतपत परिस्थिती आपल्या देशात किंवा राज्यात नाही. परंतु सरकारकडून लोकांना भिती दाखवण्यात येत आहे. संकट येतात जातात पण त्यामुळे निवडणुका स्थगित किंवा पुढे ढकरणे हा पर्याय नाही. प्रशासनाने यातून मार्ग काढत महापालिकेच्या निवडणुकात ठरलेल्या मुदतीत घेतल्या पाहिजे असे मत प्रकाश आंबेडकरांनी व्यक्त केले.

एनआरसी, एनपीआर आणि सीएए संदर्भात बोलतांना प्रकाश आंबेडकर म्हणाले, या कायद्याला देशभरातील जनतेचा विरोध आहे, जे लोक कायद्याला विरोध करतील त्यांना दाबण्याचा सरकारकडून प्रयत्न केला जातोय. जे लोक आंदोलनात सहभागी होत आहेत, त्यांची नावे नागरिकत्व कायद्यातून कायमची वगळण्यात येऊ शकतात अशी परिस्थीती निर्माण करण्यात आली आहे.

कुठल्याही परिस्थितीत एनआरसी, सीएएच्या विरोधातील आंदोलन कुमकूवत करण्याचे सरकारचे प्रयत्न आहेत. परंतु एप्रिल- मे नंतर देशातील परिस्थिती आणखी चिघळेल असा धोक्याचा इशारा देखील आंबेडकरांनी यावेळी दिला. एस बँके पाठोपाठ लवकरच देशभरातील आणखी पाच मोठ्या बँका बुडण्याच्या मार्गावर असल्याचे सांगतानाच देशात अराजकता माजवण्याचा सरकारचा प्रयत्न असल्याचा आरोप प्रकाश आंबेडकरांनी केला.