भाजपला भांडण लावल्याशिवाय राजकारण करता येत नाही - नवाब मलिक

भिवंडी : भाजपाला भांडण लावल्याशिवाय राजकारण करता येत नाही. त्यामुळे देशात आणि राज्यातील वातावरण गढूळ होत आहे अशी टिका अल्पसंख्यांक विकास मंत्री नवाब मलिक यांनी केली. शनिवारी (ता.29) भिवंडीत रोजगार मेळाव्याच्या कार्यक्रमात ते बोलत होते. राज्यात बेरोजगारांची समस्या मोठ्या प्रमाणावर वाढल्याने महाविकास आघाडी चालू अर्थसंकल्पीय अधिवेशनात अर्थसंकल्पात रोजगारासाठी योजना जाहीर करेल, तसेच मुस्लिम समाजाला आरक्षण देणार असल्याची माहिती नवाब मलिक यांनी दिली. 

येथील बीएनएन महाविद्यालयाच्या कौशल्य विकास विभागाच्यावतीने रोजगार मेळावा आयोजित करण्यात आला होता. यावेळी मंत्री नवाब मलिक, महापौर प्रतिभा पाटील, उपायुक्त दिपक कुरळेकर, विजय जाधव, बी. डी. जाधव, प्राचार्य डॉ. अशोक वाघ, उपप्राचार्य डी. एल. अहिरे, विनोद भानुशाली, राष्ट्रवादीचे शहराध्यक्ष भगवान टावरे यांच्यासह युवक-युवती, विद्यार्थी उपस्थित होते. 

शैक्षणिक क्षेत्रातील मुस्लिम आरक्षणाबाबत भाजप सरकारच्या काळात उच्च न्यायालयाने शिक्षण क्षेत्रातील पाच टक्के मुस्लिम आरक्षण मान्य केले. त्यानंतर देखिल कायदेशीर सल्ला घेतो म्हणून भाजप सरकार आणि तत्कालीन मुख्यमंत्री देवेंद्र फडणवीस यांनी विनाकारण मुस्लिम अरक्षणाचा विषय लांबत ठेवला. मुस्लिम आरक्षणाबाबत भाजप नेते विनाकारण लोकांची दिशाभूल करीत आहेत. शैक्षणिक क्षेत्रातील मुस्लिम आरक्षणामुळे राज्यातील एससी, एसटी, मराठा, ओबीसी यांच्या आरक्षणाला कुठल्याही प्रकारचा धक्का लागणार नसून उच्च न्यायालयाच्या निर्देशाप्रमाणे शैक्षणिक क्षेत्रातील पाच टक्के मुस्लिम आरक्षण महाआघाडी सरकार कायदेशीर मार्गाने लागू करेल, असे आश्वासन याप्रसंगी नवाब मलिक यांनी दिले. 

बेरोजगारांसाठी लवकरच घोषणा 
रोजगार मेळाव्यात 650 युवकांनी सहभाग घेतला, तर सुमारे 40 पेक्षा अधिक नामवंत कंपन्या या रोजगार मेळाव्यात सहभागी झाल्या होत्या. जवळपास 500 हुन अधिक बेरोजगारांना या मेळाव्याच्या माध्यमातून रोजगार मिळणार असल्याचेही मलिक यांनी सांगितले. उपमुख्यमंत्री अजित पवार रोजगारा संदर्भात मोठी घोषणा आणि योजना लागू करणार असून त्यामाध्यमातून राज्यातील बेरोजगार युवकांना रोजगार मिळणार आहे, अशी माहिती मंत्री मलिक यांनी दिली.