ठाणे : कुख्यात गुंड अंडरवर्ल्ड डॉन छोटा राजन उर्फ राजेंद्र सदाशिव निकाळजे उर्फ नाना याला वाढदिवसानिमित्त शुभेच्छा (अभिष्टचिंतन) देणारे बॅनर ठाण्यासारख्या सुसंस्कृत शहरात लागल्याने रविवारी खळबळ उडाली.छोटा राजन सध्या कारागृहात शिक्षा भोगत असतानाही ठाण्यातील गडकरी रंगायतन,कळवा नाका आणि धर्मवीरनगर (तुळशीधाम) येथील ठाणे महापालिकेच्या टीएमटी बस थांब्यावर ही अनधिकृत बॅनरबाजी करण्यात आली होती.
याबाबतचे वृत्त वाऱ्यासारखे पसरताच खडबडून जागे झालेल्या ठाणे पोलिसांनी अज्ञात व्यक्तीविरोधात गुन्हे दाखल केले आहेत.अशी माहिती पोलीस उपयुक्त सुभाष बुरसे यांनी दिली. दरम्यान,राज्यात सरकार बदलल्यानंतर गुंडाचे उद्दात्तीकरण सुरु झाल्याच्या चर्चा होऊ लागल्या आहेत.
ठाणे शहराला वेगळा सांस्कृतिक वारसा लाभला आहे.गेल्या काही वर्षात ठाणे पोलिसांनी शहरातील गुंडगिरी संपुष्टात आणली असतानाच पुन्हा छोटेमोठे गुंड डोके वर काढू लागले आहेत.अशातच शनिवारी मध्यरात्रीनंतर ठाण्यात ठिकठिकाणी कुख्यात छोटा राजन याच्या अभिष्टचिंतनाचे बॅनर ठिकठिकाणी झळकल्याने खळबळ उडाली.छोटा राजन अर्थात सी.आर. यांचा वाढदिवस येत्या (आज) १३ जानेवारी रोजी आहे. याचे औचित्य साधून ठाण्यातील तलावपाळी नजीकच्या राम गणेश गडकरी रंगायतन नाट्यगृहासमोरील टीएमटी बस थांब्यावर,कळवा नाका आणि घोडबंदर रोडवरील धर्मवीरनगर याठिकाणी शनिवारी मध्यरात्रीच्या सुमारास छोटा राजन याला वाढदिवसाच्या शुभेच्छा देणारे बॅनर लावण्यात आले.
या बॅनरवर सी.आर.सामाजिक संघटना,महाराष्ट्र राज्य असा उल्लेख असून आधारस्तंभ राजेंद्र सदाशिव निकाळजे यांना वाढदिवसाच्या हार्दिक शुभेच्छा देण्यात आल्या आहेत.या बॅनरवर शुभेच्छुक म्हणून संघटनेचे ठाणे शहर अध्यक्ष प्रकाश भालचंद्र शेलटकर यांच्या नावासह संघटनेच्या ठाणे शहर महिला अध्यक्ष संगीताताई शिंदे,मुंबई शहर अध्यक्ष राजाभाऊ गोळे आणि संस्थापक अध्यक्ष एडवोकेट हेमचंद्र उर्फ दादा मोरे आदींची छबी झळकत होती. या अनधिकृत बॅनरबाजींची माहिती पोलिसांना मिळताच तातडीने हे बॅनर हटवून अज्ञात व्यक्तीविरोधात गुन्हे दाखल करण्यात आले, अशी माहिती पोलिसांनी दिली. यातील शेलटकर हा ठाण्यातील वागळे इस्टेट परिसरात राज्यातील सत्तेत असलेल्या एका मोठ्या राजकीय पक्षाशी संबंधित असल्याचे सूत्रांनी सांगितले.
कुख्यात अंडरवर्ल्ड डॉन राजेंद्र निकाळजे उर्फ छोटा राजन उर्फ नाना याच्या छोटा राजन या नावावरून सी.आर.(छोटा राजन) नावाची सामाजिक संघटना स्थापन करण्यात आली आहे. हत्या,खंडणीसह धमकावणे आदी विविध गुन्हयाची नोंद असलेल्या छोटा राजन याला मुबईतील एका वरीष्ठ पत्रकाराच्या हत्येप्रकरणी परदेशात अटक करण्यात आली.तेव्हापासून छोटा राजन तिहार तुरुंगात शिक्षा भोगत आहे.त्याच्याविरुद्ध सुरु असलेल्या खटल्याच्या सुनावणीस छोटा राजन व्हिडिओ कॉन्फरन्सींगद्वारे हजर राहतो.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.