पिंपरी: पिंपरी चिंचवड महापालिकेच्या स्थायी समितीच्या सदस्यपदासाठी पक्षाची शिफारस डावलून स्वतः च्या मर्जीतील नगरसेविकेचे नाव देणं महापालिकेतील शिवसेना गटनेते राहुल कलाटे यांच्या अंगलट आले आहे. पक्षशिस्त भंग केल्याने त्यांना गटनेतेपदाचा तात्काळ राजीनामा देण्याचा आदेश शिवसेना नेते व खासदार संजय राऊत यांनी आज दिला.
शिवसेना सचिव अनिल देसाई यांनी याबाबत खुलासाही कलाटे यांच्याकडून सात दिवसाच्या आत मागवला आहे. तो समाधानकारक वाटला नाही, तर त्यांच्याविरुद्ध कारवाई होण्याची शक्यता आहे. स्थायी सदस्य निवडीत पक्षादेशाचा भंग केल्याने गटनेतेपदाचा तात्काळ राजीनामा देण्याचा आदेश आहे,असे शिवसेना उपनेते रवींद्र मिर्लेकर यांनी कलाटे यांना दूरध्वनीवरून सांगितले आहे.
महापालिकेच्या स्थायी समिती सदस्यपदी १८ तारखेला आठ सदस्यांची निवड झाली.त्यात शिवसेनेच्या कोट्यातून अश्विनी चिंचवडे यांचे नाव पक्षाने दिले होते. परंतु, कलाटे यांनी पक्षादेश डावलून आपल्या समर्थक मीनल यादव यांचे नाव दिल्याने त्यांच्या गटनेतेपदावर संक्रांत आली.
गटनेतेपदी काम करत असताना स्वतःच्या मर्जीतील लोकांना पदे वाटून आपण पक्षशिस्तीचा भंग केला आहे. पक्षादेश न पाळता वेगळाच अजेंडा राबवत आहात. त्यामुळे आपण महापालिका शिवसेना गटनेतेपदाचा राजीनामा त्वरित महापौर व विभागीय आयुक्तांकडे द्यावा. असा आदेश राऊत यांनी कलाटे यांना दिला आहे. तो शिवसेना सचिव अनिस देसाई यांनी बजावला.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.