केजच्या नवीन गणिताचे कॅलक्युलेटर माझ्याकडे आहे : पंकजा मुंडे  

केज : नमिता मुंदडांना मी उमेदवारी दिली आहे. मतदान करताना कमळाचे चिन्ह बघा त्यात मी आणि दिवंगत लोकनेते गोपीनाथराव मुंडे दिसतील. त्यावरच मतदान करा, मी समजून नमिता मुंदडांना विजयी करा असे आवाहन ग्रामविकास मंत्री पंकजा मुंडे यांनी केले. केज हा माझा आणि दिवंगत लोकनेते गोपीनाथराव मुंडे यांचा गड असल्याचेही पंकजा मुंडे म्हणाल्या.

भाजप महायुतीच्या उमेदवार नमिता अक्षय मुंदडा यांच्या प्रचारार्थ ग्रामविकास मंत्री पंकजा मुंडे यांनी तालुक्यातील अंमळेचा बरड येथे सभा घेतली. 

आपल्याला बेरजेचे राजकारण वडिलांनी शिकविले आहे. राजकारणात कोणीच कायमचा शत्रु नसतो. म्हणून आपण जादूची कांडी फिरविली आणि नमिता मुंदडाला उमेदवारी दिली. त्यामुळे त्यांचा विजय कोणीही रोखू शकत नाही असेही पंकजा मुंडे म्हणाल्या. 

नमिता मुंदडांची उमेदवारी जाहीर करताना आपण मतदार संघातील पक्षातील सर्व प्रमुखांना विश्वासात घेतले. कालानुरुप निर्णय घ्यावे लागातात. राष्ट्रवादी त्यांना उमेदवारी देऊन पाडणार होते. मुंदडांचे ५० हजार आणि आपले भाजपचे मतदान एकत्र होऊन त्यांचा विक्रमी मतांनी विजय होईल, असा विश्वासही व्यक्त केला.

केजमध्ये नमिता नाही तर पंकजा मुंडे उभा आहे असे समजून मतदान करण्याचे आवाहनही त्यांनी केले. नवीन गणिताचे कॅलक्युलेटर आपल्याकडे असल्याचेही पंकजा मुंडे म्हणाल्या. आपण दोन उमेदवार बदलले परंतु कुठलाच रुसवा झाला नाही. कारण मी आणि तुम्ही सर्वांनी त्यांच्यावर प्रेम केले. म्हणून हा बदल स्विकारुन नमिता मुंदडांना विजयी करण्याचे आवाहन पंकजा मुंडे यांनी केले. 

यावेळी जिल्हाध्यक्ष रमेश पोकळे, माझी जिल्हा परिषद उपाध्यक्ष विक्रम मुंडे, राजेंद्र मस्के, सभापती संतोष हंगे, अक्षय मुंदडा, सभापती संदीप पाटील, जिल्हा परिषद सदस्य विजयकांत मुंडे, योगीनी थोरात, भारत काळे, रमाकांत मुंडे, हारुण इनामदार, सुरेंद्र तपसे, दत्ता धस आदींची उपस्थिती होती.