बीड : महाराष्ट्र लोकसेवा आयोगाने पोलिस उपनिरीक्षक पदासाठी शुक्रवारी प्रसिद्ध केलेल्या जाहिरातीत एनटी-ड प्रवर्गाला एकही जागा आरक्षित केली नाही. त्यामुळे या प्रवर्गातील उमेदवारांमधून संताप व्यक्त होत आहे. हा प्रकार अतिशय गंभीर असून राज्य शासनाने यात तात्काळ लक्ष घालावे तसेच या प्रवर्गातील उमेदवारांवरील अन्याय दूर करण्यासाठी सुधारित जाहिरात प्रसिद्ध करावी, अशी मागणी माजी मंत्री पंकजा मुंडे यांनी मुख्यमंत्री उध्दव ठाकरे यांच्याकडे एका निवेदनाद्वारे केली.
महाराष्ट्र लोकसेवा आयोगाच्या संकेतस्थळावर शुक्रवारी दुय्यम सेवा अराजपत्रित 'गट- ब' साठी संयुक्त पूर्व परिक्षेची जाहिरात प्रसिद्ध केली. या अंतर्गत पोलीस उप निरीक्षक गट-ब (अराजपत्रित) पदाच्या ६५० जागांची भरती करण्यात येणार आहे. एकूण ६५० जागांपैकी ४७५ जागा हया विविध प्रवर्गासाठी आरक्षित करण्यात आल्या आहेत.
परंतु, शासन निर्णया प्रमाणे 'भज-ड' (एनटी ड) प्रवर्गासाठी सरळसेवा भरतीसाठी दोन टक्के जागा राखीव असतांना देखील या प्रवर्गासाठी एकही जागा आरक्षित दाखवली नाही. त्यामुळे स्पर्धा परीक्षांचा अभ्यास करणाऱ्या उमेदवारांमधून संताप व्यक्त होत आहे. एनटी ड संवर्गातील उमेदवारांवर हा सरळ अन्याय असल्याचे पंकजा मुंडे यांनी म्हटले आहे. यात सरकारने तात्काळ लक्ष घालावे व अन्याय दूर करण्यासाठी सुधारित जाहिरात प्रसिद्ध करावी, अशी मागणी त्यांनी केली.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.