मारुतीराया तुम्हीच सांगा, पाणीयोजना आणली कुणी? विखेंनी की थोरातांनी ?    

संगमनेर (नगर):  संगमनेर तालुक्यातील अंभोरे गावातील मारुती मंदीरासमोर राष्ट्रीय पेयजल योजनेंतर्गत पाणीपुरवठा योजनेचे काल सायंकाळी काँग्रेसचे प्रदेशाध्यक्ष बाळासाहेब थोरात यांच्या हस्ते भुमिपूजन झाले.

आज सकाळी त्याच योजनेचे त्याच ठिकाणी गृहनिर्माणमंत्री राधाकृष्ण विखे पाटील यांच्या हस्ते भुमिपूजन झाले. त्यामुळे मारुतीरायाच्या साक्षीने एकाच योजनेचे दोनदा भुमिपूजन झाल्याने, मारुतीराया तुम्हीच सांगा, ही योजना आणली कुणी? असे म्हणण्याची वेळ ग्रामस्थांवर आली आहे.

संगमनेर तालुक्यातील अंभोरे येथील साईमंदिर संरक्षक भिंत व राष्ट्रीय पेयजल योजनेंतर्गत पाणीपुरवठा योजनेचे उदघाटन काल रात्री प्रदेशाध्यक्ष आमदार बाळासाहेब थोरात यांच्या हस्ते झाले. या वेळी झालेल्या कार्यक्रमात थोरात यांनी संगमनेरमधील शिक्षण, सहकार, सांस्कृतिक वातावरणाचा राज्यात बोलबाला आहे, मात्र बाहेरच्या प्रवृत्तींना हे सहन होत नाही, असा आरोप विखे पाटील यांचे नाव न घेता केला.

आज सकाळी मारुती मंदिराजवळ विखे पाटील यांच्या हस्ते राष्ट्रीय पेयजल योजनेंतर्गत पाणीपुरठा योजनेचे भुमिपूजन पुन्हा झाले. या वेळी विखे पाटील यांनी थोरातांवर जोरदार हल्ला चढवताना, राज्यात पुन्हा युतीचे सरकार येणार आहे. त्यामुळे काँग्रेसचा आमदार निवडून देऊन काय उपयोग, त्यामुळे परिवर्तन करा, असा सल्ला विखे पाटील यांनी जनतेला दिला.

सारख्याच कामांचे दोन दिवसात, दोन विरोधी नेत्यांच्या हस्ते व समर्थकांसह शक्तीप्रदर्शन करीत भुमिपूजन झाल्याने, ही कामे नक्की कोणी आणली असा प्रश्न राजकारणात स्वारस्य नसलेल्या ग्रामस्थांसमोर पडला आहे.

योजनेचे श्रेय थोरात यांचेच : सरपंच
तालुक्यातील गुंजाळवाडी व अंभोरे येथील पाणीपुरवठा योजना मंजूर करण्यासाठी आमदार बाळासाहेब थोरात यांनी प्रयत्न केले आहेत. या योजनांचा सर्वे करुन घेवून त्याप्रमाणे नगरच्या पाणी पुरवठा विभागातील वरिष्ठ अधिकाऱ्यांनी पहाणी केली होती.

त्याप्रमाणे इस्टिमेट तयार करुन, थोरात यांनी वरीष्ठ पातळीवर तसेच इंद्रजीत थोरात, व मी स्वतः यासाठी अनेकदा पाठपुरावा केला आहे. या संपूर्ण योजनेचे श्रेय केवळ आमदार बाळासाहेब थोरात यांचे आहे, अशी प्रतिक्रीया अंभोरे ग्रामपंचायतीचे सरपंच भास्कर खेमनर यांनी `सरकारनामा`शी बोलताना दिली.