नवनीत राणांच्या जातीचा मुद्दा उच्च न्यायालयात 

नागपूर : अमरावती लोकसभा मतदारसंघाच्या खासदार नवनीत राणा यांच्या निवडीला उच्च न्यायालयाच्या नागपूर खंडपीठात आव्हान देण्यात आले असून न्यायालयाने काल त्यांना नोटीस बजावली आहे. राणांच्या वडिलांचे अनुसूचित जातीचे प्रमाणपत्र जात पडताळणी समितीने रद्द ठरवले असल्याचे याचिकाकर्त्यांचे म्हणणे आहे. 

माजी खासदार आनंदराव अडसूळ आणि सुनील भालेराव यांनी ही याचिका दाखल केली आहे. याचिकाकर्त्यांनुसार अमरावती लोकसभा मतदारसंघ अनुसूचित जाती प्रवर्गासाठी राखीव आहे. पण, नवनीत राणा या "लुहाणा' जातीच्या आहेत. त्यांच्या वडिलांचे अनुसूचित जातीचे प्रमाणपत्र जात पडताळणी समितीने रद्द ठरवले आहे.

असे असतानाही बनावट दस्तऐवजाच्या आधारावर राखीव मतदारसंघातून निवडणूक लढवली. ही मतदारांची फसवणूक असून त्यांची निवड अवैध आहे. त्यांची निवड रद्द ठरवण्याची विनंती याचिकाकर्त्यांनी केली आहे. याचिकाकर्त्यांतर्फे ऍड. राघव कविमंडन यांनी बाजू मांडली.