Vaijnath Waghmare Resign : ठाकरे गटाच्या नेत्या सुषमा अंधारेंचे विभक्त पती वैजनाथ वाघमारेंची शिवसेनेला सोडचिठ्ठी..

Shivsena Shinde Group Spokeperson Vaijnath Waghmare Resign: ठाकरे गटाच्या नेत्या सुषमा अंधारे (sushma andhare )यांचे विभक्त पती अँड. वैजनाथ वाघमारे यांनी शिवसेना शिंदे गटाच्या प्रवक्तेपदाचा राजीनामा दिला आहे.

काही दिवसापूर्वी त्यांनी शिवसेनेत प्रवेश केला होता. शिवसेनेचे पक्षाचे सचिव संजय मोरे यांच्याकडे त्यांनी आपला राजीनामा सोपवला आहे. सुषमा अंधारेंच्या आक्रमक भाषणांचा झंझावात सुरू असताना, दुसरीकडे एकनाथ शिंदे यांच्या गटानं वैजनाथ वाघमारे यांना काही दिवसापूवी पक्षात घेतलं होतं.

शिवसेनेत प्रवेश केल्यानंतर वाघमारे यांनी सुषमा अंधारेंवर गंभीर आरोप केले होते.शिवसेना पक्षाकडून पक्षबांधणीत कुठचीच महत्त्वाची जबाबदारी दिली जात नसल्याने वैजनाथ वाघमारे नाराज होते. त्यामुळे त्यांनी पक्ष सोडण्याचा निर्णय घेतला.

पक्षप्रवेशाच्या वेळी वाघमारे यांनी सुषमा अंधारेंच्या विरोधात निवडणूक लढणार असल्याचे म्हटलं होते. "पक्ष जो आदेश देईल तो मला मान्य असेल. उद्या पक्षाने सांगितलं निवडणूक लढा, तर सुषमा अंधारे असू दे किंवा इतर कोणीही मी निवडणूक लढेन," असे वाघमारे म्हणाले होते.

शिवसेना प्रवेशानंतर वाघमारे म्हणाले होते की , आम्ही (सुषमा अंधारे) पंधरा वर्ष सोबत काम केले. त्यांनी ठाकरे गटात प्रवेश केला. त्यांनी पक्षप्रवेश करु नये, असं मला वाटत होतं. त्यांचा हा निर्णय मला पटला नाही. त्यामुळे आम्ही विभक्त झालो. "सुषमा अंधारेंना इतिहासाची पुस्तकं कुणी दिली? हा खरा प्रश्न आहे," असेही ते म्हणाले होते.

"एखाद्या महिलेच्या राजकीय मुद्द्यांवर टीका करण्याऐवजी तिच्या वैयक्तिक गोष्टींवर भाष्य केले जात आहे," अशा प्रतिक्रिया तेव्हा सोशल मीडियावर नेटकऱ्यांनी केली होती. मूळचे बीड जिल्ह्यातील असलेले वैजनाथ वाघमारे हे राजकीय क्षेत्रात कार्यरत नव्हते, ते सामाजिक कार्यात सक्रिय होते.

एकनाथ शिंदेंच्या ‘बाळासाहेबांची शिवसेना’ पक्षातूनच त्यांनी राजकीय कारकीर्दीस सुरुवात केली होती. वैजनाथ वाघमारे यांचा राजीनामा अद्याप मंजूर करण्यात आलेला नाही. वाघमारे यांची समजूत काढण्याचा प्रयत्न पक्ष सचिवांकडून केला जात आहे.