माजी केंद्रीय अर्थमंत्री अरुण जेटली यांचे निधन

देशाचे माजी अर्थमंत्री अरुण जेटली यांचे आज दीर्घकालीन आजाराने निधन झाले. जेटली यांच्यावर दिल्लीच्या एम्समध्ये गेले काही दिवस उपचार सुरु होते. जेटली यांच्यावर मूत्रपिंड प्रत्यारोपणाची शस्त्रक्रिया करण्यात आली होती. त्यानंतरही ते सतत प्रकृती अस्वास्थ्याने त्रस्तच राहिले होते. त्यांच्या निधनाचे वृत्त एएनआय या वृत्तसंस्थेने दिले आहे.
माजी केंद्रीय अर्थमंत्री अरुण जेटली यांचे निधन

नवी दिल्ली : देशाचे माजी अर्थमंत्री अरुण जेटली यांचे आज दीर्घकालीन आजाराने निधन झाले. जेटली यांच्यावर दिल्लीच्या एम्समध्ये गेले काही दिवस उपचार सुरु होते. जेटली यांच्यावर मूत्रपिंड प्रत्यारोपणाची शस्त्रक्रिया करण्यात आली होती. त्यानंतरही ते सतत प्रकृती अस्वास्थ्याने त्रस्तच राहिले होते. त्यांच्या निधनाचे वृत्त एएनआय या वृत्तसंस्थेने दिले आहे. 

"मोदी-1' सरकारमध्ये अर्थ, संरक्षण, माहिती प्रसारण आदी महत्त्वाच्या मंत्रालयांची जबाबदारी जेटलींवर देण्यात आली होती. मनोहर पर्रीकर व स्मृती इराणींकडे बाकीची खाती नंतर देण्यात आली; मात्र अर्थखाते मोदींनी जेटलींकडेच ठेवले. त्यांच्या मंत्रिपदाच्या काळातच मोदी सरकारने वस्तू व सेवा कर (जीएसटी) सारखा ऐतिहासिक कायदा बनविला. विदेशातील काळ्या पैशाला वेसण घालण्यासाठीचा कायदाही जेटलींनीच तयार केला होता. 

मंत्रिपदाच्या जबाबदाऱ्या सांभाळतानाच जेटली राज्यसभेचे सभागृहनेते म्हणूनही काम पाहत होते. मात्र मागील वर्षाच्या उत्तरार्धापासून त्यांची प्रकृती अधिकच ढासळली. मूत्रपिंडाचा विकार, मधूमेह याबरोबरच त्यांना गतवर्षी 'सॉप्ट टिश्‍यू' प्रकारचा कर्करोग झाल्याचेही निदान झाले. त्यावर त्यांनी या वर्षी जानेवारीत अमेरिकेत जाऊन उपचार घेतले व ते परतले. नंतर त्यांनी बराच काळ घरूनच मंत्रालयाचा कारभार चालविला. भाजपच्या या वर्षी झालेल्या राष्ट्रीय कार्यकारिणी बैठकीच्या नंतर जेटली यांचे सार्वजनिक दर्शन अभावानेच झाले. 

कृष्ण मेनन मार्गावरील शासकीय निवासस्थानीच रुग्णालय बनवून जेटली यांच्यावर डॉक्‍टर काही काळ उपचार करत होते. यंदाच्या लोकसभा निवडणुकीनंतर त्यांनी प्रकृती अस्वास्थ्यामुळे 'मोदी-2' मंत्रिमंडळात सामील होण्यास नकार दिला होता. मात्र ब्लॉग व फेसबुकसारख्या माध्यमांद्वारे ते अजूनही सक्रिय होते. जीएसटीची दोन वर्षे, कलम 370, तीनदा तलाक प्रथेवर बंदी यांसारख्या अत्यंत कळीच्या कायद्यांवर त्यांनी मतप्रदर्शन केले आहे. निवडून आल्यावर तसेच अर्थसंकल्प सादर होण्यापूर्वी पंतप्रधानांनी जेटली यांच्या घरी जाऊन सल्लामसलत केली होती.

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

Related Stories

No stories found.
Sarkarnama News
sarkarnama.esakal.com