namita mundada support pankaja munde | Sarkarnama

नमिता मुंदडांना आता पंकजा मुंडेंची साथ ! 

सरकारनामा ब्युरो
गुरुवार, 10 ऑक्टोबर 2019

दिवंगत लोकनेत्या डॉ. विमलताई मुंदडा यांनी सलग पाच वेळा केज मतदार संघाचे प्रतिनिधित्व करत मंत्रीपदाच्या माध्यमातून मतदार संघात विकासाची अनेक कामे केली. यासह ग्रामविकास मंत्री पंकजा मुंडे यांना मानणारा मोठा घटक मतदार संघात असल्याने मुंदडांचा दुहेरी फायदा मानण्या येतो. 

अंबाजोगाई : सासुबाई दिवंगत लोकनेत्या डॉ. विमलताई मुंदडा यांनी मतदार संघात विणलेले विकासाचे जाळे आणि सासरे नंदकिशोर मुंदडा व पती अक्षय मुंदडा यांच्या फळीला आता ग्रामविकास मंत्री पंकजा मुंडे यांचे बळ मिळाल्याने नमिता मुंदडा यांचा वारु वेगाने धावत आहे. जुन्या टीमला आता भाजपच्या नव्या फळीनेही बळ दिले आहे. 

सलग पाच वेळा विजयी होण्याचा विक्रम जिल्ह्यात दिवंगत लोकनेत्या डॉ. विमल मुंदडा यांनाच करता आलेला आहे. या मतदार संघातून सलग पाच वेळा विजयी होणाऱ्या दिवंगत मुंदडा यांनी आमदारकी आणि मंत्रीपदाच्या माध्यमातून स्वाराती रुग्णालयाचे विस्तारीकरण, मानसोपचार व वृद्धोपचार केंद्र, बंधारे, रस्ते, सीताफळ संशोधन केंद्र, उपजिल्हा रुग्णालये अशी अनेक विकास कामे केली. त्यांनी सामान्यांशी कधीही नाळ तुटू दिली नाही. उच्चशिक्षीत आणि मंत्रीपदावर असतानाही अंत्यविधी आणि इतर सुख -दु:खात सहभागी होणाऱ्या नेत्या अशी ओळख असलेल्या दिवंगत विमल मुंदडा यांना मतदारांनीही कधी हात आखडला नाही. त्यांच्या विजयाच्या मतांचा आलेख कामय उंचावलेलाच राहीला. तर, सासरे नंदकिशोर मुंदडां यांनीही मतदार संघात सामाजिक कामाच्या माध्यमातून कार्यकर्त्यांची फळी घट्ट विणलेली आहे. 

पती अक्षय मुंदडा यांचीही तरुण फळी आहे. दरम्यान, मागच्या पराभवातनंतर मुंदडा कुटूंबियांनी सामाजिक, अध्यात्मिक, सांस्कृतिक, विवाह समारंभ आणि इतर सार्वजनिक व सुख - दु:खाच्या प्रसंगात सहभागी होत आपला संपर्क कायम ठेवला. पक्षांतर्गत त्रासातही त्यांनी कधी विचलीत न होता सामान्यांशी नाळ घट्ट ठेवली. म्हणूनच त्या सर्वेमध्ये पुढे असल्याने त्यांना उमेदवारी देण्याचा निर्णय घेतल्याचे खुद्द ग्रामविकास मंत्री पंकजा मुंडे यांनीच सांगितले. 

दरम्यान, त्यांना भाजप प्रवेशानंतर उमेदवारी भेटून त्यांनी जोरदार प्रचारालाही सुरुवात केली आहे. मतदार संघाची सामाजिक रचनाच मुळ भाजप पुरक असून मतदार संघात पंकजा मुंडे यांना मानणारा मोठा घटक असल्याने त्याची साथ सहाजिकच नमिता मुंदडा यांना भेटणार आहे. त्यांच्या प्रवेशानंतर भाजपची टीम सोबत येईल का, या विरोधकांच्या प्रश्नांनाही आता पुर्णविराम भेटला आहे. 

मुंदडांच्या टिमसोबतच आता मतदार संघातील रमेश आडसकर, सभापती संतोष हंगे, जिल्हा परिषद सदस्या डॉ. योगीनी थोरात, राणा डोईफोडे, रासपचे बाळासाहेब दोडतले, अंबाजोगाईचे लोमटे व कोपले आदी नेत्यांनीही आता प्रचारात सक्रीय सहभाग घेतला आहे. त्यामुळे नमिता मुंदडांच्या अगोदरच्या घट्ट जाळ्याला आता पंकजा मुंडे यांचे बळ मिळणार आहे. 

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख