बुटीबोरीत कॉंग्रेस-राष्ट्रवादीत काय बिनसले?

नागपूर : बुटीबोरी नगरपरिषदेच्या पहिल्या निवडणूकीसाठी भाजप-शिवसेनेची युती झाली आहे. तर आघाडीमधील कॉंग्रेस व राष्ट्रवादी कॉंग्रेसने स्वतंत्र लढण्याचा निर्णय घेतला आहे. जिल्ह्यातील महत्वाचे शहर असलेल्या बुटीबोरीच्या राजकाराणावर भाजपची पकड असल्याचे युतीमुळे स्पष्ट झाले. तर कॉंग्रेस-राष्ट्रवादीत काय बिनसले, याची चर्चा सुरु झाली आहे. दुसरीकडे राष्ट्रवादी कॉंग्रेस व कॉंग्रेसमध्ये सर्वच आलबेल नसल्याचे चित्र असून त्याचा परिणाम येत्या विधानसभा व जिल्हा परिषद निवडणुकीवर पडू शकतो.

२३ जून रोजी होणाऱ्या बुटीबोरी नगरपरिषद निवडणुकीसाठी उमेदवारी अर्ज भरण्याची मुदत गुरुवारी संपली. नगराध्यक्षपदासाठी सात तर ९ प्रभागातील १८ नगरसेवकांसाठी ६२ उमेदवारांनी अर्ज दाखल केले आहेत. नगराध्यपदासाठी भाजप-शिवसेना युतीचे बबलू गौतम, राष्ट्रवादी कॉंग्रेसचे बबलू श्रीवास, कॉंग्रेसकडून जाकिर उर्फ बाबू पठाण यांनी उमदेवारी दाखल केली तर मंगेश वनारसे, तुषार डेरकर, डॉ. मुकेश (मूलचंद ) कापसे, राजेन्द्र भालेराव हे अपक्ष नगराध्यक्षपदासाठी उमेदवार आहेत. १८ नगरसेवकांसाठी पक्षाचे ५४ उमेदवार (कॉंग्रेस, रा.कॉ. व भाजप-सेना) तर ८ अपक्ष उमेदवारांनी अर्ज दाखल केले आहेत. 

१३ जूनपर्यंत अर्ज परत घेण्याची मुदत आहे. १४ तारखेला चिन्ह वाटप होणार आहे. ही निवडणूक तिरंगी होणार असे सध्यातरी वाटते. मात्र, बुटीबोरीत अद्यापही स्थानिक व स्थायिक हा वाद नागकिरांच्या मनात घर करून आहेच.