Babanrao Pachpute : माजी मंत्री पाचपुतेंवर पुतण्याची दुसऱ्यांदा मात; उपसरपंचपदही हिरावले

Shrigonda Political News : श्रीगोंदा तालुक्यातील दहा ग्रामपंचायतीच्या उपसरपंच पदाची निवडणूक आज पार पडली. या निवडणुकीत संपूर्ण तालुक्याचे लक्ष लागून असलेल्या काष्टी येथे भाजपचे आमदार माजी मंत्री बबनराव पाचपुते (Babanrao Pachpute) यांचे बहुमत असतानाही पुतणे साजन पाचपुते यांनी राजकीय खेळी करत उपसरपंच पदासाठी राहुल टिमुणे हा आपला उमेदवार अवघ्या एका मताने निवडून आणत आमदार पाचपुते गटाला मोठा धक्का दिला आहे.

बहुचर्चित काष्टी ग्रामपंचायतीमध्ये आमदार पाचपुते गटाच्या अलका शांताराम राहिंज आणि साजन पाचपुते गटाचे राहुल प्रकाश टिमुणे यांच्यात उपसरपंच पदासाठी लढत झाली. साजन पाचपुते यांच्याकडे सरपंचासह आठ सदस्यांचे बळ होते तर आमदार पाचपुते गटाकडे सतरापैकी दहा सदस्यांचे स्पष्ट बहुमत होते.

परंतु, आमदार पाचपुते गटाचा एक सदस्य फुटल्याने दोन्ही उमेदवारांना प्रत्येकी नऊ मते पडली. दोन्ही उमेदवारांना समसमान मते पडल्याने सरपंच साजन पाचपुते यांनी आपल्या एका मताचा विशेषाधिकार वापरीत निर्णायक मतदान टिमुणे यांना केल्याने राहुल टिमुणे एक मताने विजयी झाले.