दौंड (पुणे) : पुणे व नगर जिल्ह्यात खून, दरोडे व राष्ट्रीय महामार्गावर लूटमार करणाऱ्या एका टोळीवर पुणे ग्रामीण पोलिसांनी महाराष्ट्र संघटित गुन्हेगारी नियंत्रण कायद्यांतर्गत (मकोका) कारवाई केली आहे. जिल्ह्याच्या पोलीस अधीक्षकपदाची सूत्रे अभिनव देशमुख यांनी हाती घेतली असून, गुन्हेगारांवर धडक कारवाईला सुरूवात केली आहे.
देवगण अजिनाथ चव्हाण, गणेश अजिनाथ चव्हाण (दोघे रा. बोरावकेनगर, गोपाळवाडी, ता. दौंड), अक्षय कोंडक्या चव्हाण (रा. माळवाडी, लिंगाळी, ता. दौंड), नेपश्या पिराजी काळे (रा. राक्षशवाडी, ता. कर्जत, जि. नगर) व एक विधि संघर्षग्रस्त बालक अशा पाच जणांच्या टोळीवर ही कारवाई करण्यात आली. या टोळीतील सदस्यांचा दरोडा, खून व लूटमारी यासारख्या गुन्ह्यात सहभाग होता. त्यामुळे या सर्व आरोपींना दौंड पोलिस ठाण्याच्या हद्दीतून यापूर्वी तडीपार करण्यात आले होते. त्यानंतरही त्यांच्यात सुधारणा झालेली नव्हती.
लॉकडाउनच्या काळात ३० मार्चला या टोळीने सोलापूर - पुणे राष्ट्रीय महामार्गावर मळद (ता. दौंड) येथे ट्रकचालक काशिनाथ रामभाऊ कदम (वय ५५, रा. ढोकी, जि. उस्मानाबाद) यांचा खून केला होता. तर एका टेम्पो मदतनीसावर चाकूने वार केले होते. या खून व लुटमारीचा तपास दौंड पोलिस व पुणे ग्रामीण पोलिस दलाच्या स्थानिक गुन्हे अन्वेषण शाखेने संयुक्तपणे करीत काही आरोपींना अटक केली होती.
पुण्यातील येरवडा येथील तात्पुरत्या कारागृहातून १६ जुलैला या टोळीतील देवगण चव्हाण, गणेश चव्हाण, अक्षय चव्हाण व अन्य दोन, असे एकूण पाच कैदी खिडकीचे गज उचकटून पळून गेले होते. त्यापैकी गणेश व देवगण चव्हाण यांना पोलिसांनी पकडले. या टोळीतील अक्षय चव्हाण व नेपश्या काळे हे दोन आरोपी फरारी आहेत. आता या टोळीवर मकोका अंतर्गत कारवाई करण्यात आली आहे.
अधीक्षक अभिनव देशमुख यांनी केलेल्या पाठपुराव्यानुसार राज्याचे अतिरिक्त पोलिस महासंचालक राजेंद्र सिंह यांनी या गुन्ह्यांच्या दोषारोपपत्रास तात्काळ मंजुरी दिल्याने टोळीवर मकोका अंतर्गत कारवाई झाली, अशी माहिती दौंड पोलिस ठाण्याचे निरीक्षक सुनील महाडीक यांनी दिली.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.