अविनाश जाधवांसह मनसे पदाधिकारी पोलिसांच्या रडारवर : राज ठाकरेंची शिवतीर्थावर खलबतं

मुंबई : मनसे अध्यक्ष राज ठाकरे (Raj Thackeray) यांनी मशिदींवरील भोंगे उतरवण्यासाठी राज्य सरकारला ४ मे पर्यंतचा अल्टिमेटम दिला आहे. त्यानंतर मात्र भोंग्याविरुद्ध आंदोलन तीव्र करण्याचा इशारा दिला आहे. या पार्श्वभूमीवर मनेसेचे (MNS) अनेक नेते आणि पदाधिकारी पोलिसांच्या रडारवर आले आहेत. कायदा आणि सुव्यवस्थेचा प्रश्न निर्माण होवू नये म्हणून पोलिसांकडून मनसे पदाधिकाऱ्यांना प्रतिबंधात्मक नोटीस दिली जात आहे.

मनसे नेते अविनाश जाधव (Avinash Jadhav) यांना ठाणे पोलिसांनी १४९ कलमांतर्ग नोटीस बजावली आहे. तसेच आज उद्या सकाळी ११ वाजता ठाण्यातील नौपाडा पोलीस ठाण्यात २५ ऑगस्ट २०१६ मध्ये दाखल एका गुन्ह्याप्रकरणी त्यांना बोलाविण्यात आले आहे. याशिवाय मनसेचे पुणे जिल्हाध्यक्ष समीर थिगळे यांच्यासह खेड, आंबेगाव, जुन्नर, शिरुर तालुक्यातील ५० मनसे पदाधिकारी आणि कार्यकर्त्यांना पुणे ग्रामीण पोलीसांच्या स्थानिक गुन्हे शाखेकडुन प्रतिबंधात्मक कारवाईची नोटीस बजावण्यात आली आहे.

मनसेची आज शिवतीर्थावर महत्वाची बैठक

एका बाजूला मनसेच्या राज्यभरातील पदाधिकाऱ्यांना पोलिसांकडून प्रतिबंधात्मक कारवाईची नोटीस बजावली जात आहे. त्याचवेळी भोंग्यांबाबतची पुढची भूमिका ठरवण्यासाठी राज ठाकरे यांनी शिवतीर्थांवर आज निवडक पदाधिकाऱ्यांची बैठक बोलवली आहे. नेमकी पक्षाची भूमिका काय असेल ते पदाधिकाऱ्यांपर्यंत पोहचवण्यासाठी ही बैठक बोलवण्यात आली असल्याचे सांगण्यात येतं आहे. राज ठाकरेंच्या निवासस्थानी होणाऱ्या या बैठकीला निवडक पदाधिकारी आणि नेते उपस्थित असणार आहेत.