काय सांगता! मनसे-भाजप युती होणार?

पुणे : गेल्या काही दिवसांपासून मनसे प्रमुख राज ठाकरे (Raj Thackeray) यांच्या सभेच्या चर्चांना उधाण आले आहे. राज ठाकरेंची गुडीपाडव्याची सभा, त्यानंतर ठाण्यात झालेली उत्तरसभा आणि आता औरंगाबाद येथे होणारी सभा, या सर्व सभांमध्ये राज ठाकरेंनी घेतलेल्या भूमिकांमुळे राज्यभरात वेगळेच वातावरण तयार झाले आहे. तर दूसरीकडे राज ठाकरे यांची हिंदूत्त्वाची भूमिका आणि त्याला भाजपचा मिळणारा पाठिंबा यामुळे राज्यात आता मनसे-भाजप युतीच्या चर्चांही जोर धरु लागल्या आहेत. (MNS-BJP alliance news)

मिळालेल्या माहितीनुसार, राज ठाकरे यांच्या भूमिकेला भाजपचा वाढता पाठिंबा आणि हिंदुत्वाचा मुद्यावरून उत्तर भारतीयांचे राज ठाकरेंना वाढते समर्थन पाहता मनसे- भाजप युतीच्या चर्चा राजकीय वर्तुळापासून सर्वसामान्यांपर्यंत सुरु झाल्या आहेत. तर दूसरीकडे मनसे ही भाजपचीच टीम असल्याचा विरोधकांचा आरोप आता सत्यात उतरणार का असा सवालही उपस्थित होत आहे.

राज ठाकरे यांंनी सुरुवातीला उत्तर भारतीयांविरोधात कठोर भूमिका घेतली होती. त्यामुळे राज ठाकरे यांनी उत्तर भारतीयांबद्दलची भूमिका बदलत नाही तोपर्यंत भाजप मनसेसोबतच युतीचा कोणताही विचार करणार नाही, अशी भूमिका भाजपने घेतली होती. पण अलीकडे उत्तर भारतीयांप्रती राज ठाकरे यांची भूमिका नरमल्याने मनसे-भाजपा युती होऊ शकते, अशी माहिती सूत्रांकडून मिळाली आहे.

दरम्यान, मनसे प्रमुख राज ठाकरे (Raj Thackeray) आजपासून दोन दिवसाच्या पुणे दौऱ्यावर येणार आहेत. राज ठाकरे दोन दिवस पुण्यात मुक्काम करणार असून यावेळी ते मनसेच्या पदाधिकाऱ्यांशी चर्चा करणार आहेत. पुण्यातूनच ते १ मे रोजी औरंगाबाद येथील सभेसाठी रवाना होतील. या सभेच्या परवानगी पासून अनेक मुद्द्यांवर वाद निर्माण झाला होता. अनेक संघटनांनी या सभेला विरोध केला मात्र, औरंगाबाद पोलिसांनी अखेरच्या क्षणी अटी-शर्तींसह या सभेला परवानगी दिली. आता या सभेकडेही संपूर्ण महाराष्ट्राचे लक्ष लागले आहे.

राज ठाकरे यांची औरंगाबाद सभा आणि त्यानंतर होणाऱ्या अयोध्या दौऱ्याच्या आसपास युतीची घोषणा होण्याची शक्यता आहे. अयोध्या दौऱ्यात राज ठाकरे शक्ती प्रदर्शन करणार असल्याचीही माहिती समोर आली आहे.