Uddhav Thackeray News: शिंदे गटाचा व्हीप लागू होणार का? उद्धव ठाकरेंनी स्पष्टचं सांगितलं..

Maharashtra Political Crises : निवडणूक आयोगाचा निकाल अयोग्य आहे. गुंता वाढवण्यासाठी आयोगाने घाईघाईत निकाल दिला. आयोगाने सांगितल्या प्रमाणे आम्ही सर्व प्रतिज्ञा पत्रे सादर केली होती. पण तरीही आयोगाने शिवसेना नाव आणि चिन्ह त्यांना दिलं. हा पूर्वनियोजित कट होता. जर असा घाईघाईत निकाल द्यायचाच होता तर आम्हाला एवढं संगळ का करायला सांगितलं. आमदार अपात्रतेचा निर्णय येईपर्यंत आयोगाने निकाल द्यायला नको होता. असचं चालणार असेल तर निवडणूक आयोग बरखास्त करायला हवा, अशी मागणी माजी मुख्यमंत्री उद्धव ठाकरे यांनी केली आहे.

शिवसेना भवनात आयोजित पत्रकार परिषदेत उद्धव ठाकरे बोलत होते.' हा निकाल आम्हाला मान्य नाही, हा अन्याय आहे. केंद्रीय मंत्री अमित शहा काल परवा येऊन गेले आणि त्यांनी सांगितलं की ही शिवसेना-भाजप युती तर तसं नाहीये, हे चोललेलं धनुष्यबाण आहे. हे शिवधनुष्य रावणाला नाही पेललं ते मिंध्यांना काय पेलणार आहे. या सर्वांमागे शिवसेना संपवण्याचा कट आहे.' असा आरोप उद्धव ठाकरेंनी केला.

'पक्षनिधीचा अधिकार निवडणूक आयोगाला नाही, कोणाच्याही निधीवर दरोडा घालण्याचा अधिकार आयोगाला नाही. आयोगाचा अधिकार चिन्ह आणि नावापुरता मर्यादित असतो. देशात निवडणूका घेणं पक्षांतर्गत लोकशाही जिवंत आहे की नाही, हे पाहण्याचा अधिकार आयोगाला आहे. काही दिवसांपूर्वी निवडणूक आयुक्तांची नेमणूक करण्यात आली. जर निवडणूकांच्या माध्यमातून निवडणूक आयुक्तांची नियुक्ती व्हायला पाहिजे,' अशीही मागणी उद्धव ठाकरेंनी यावेळी केली.

'आयोगाने दोन गट मान्य केले आहेत. त्यामुळे त्यांच्या गटाचा व्हिप आम्हाला लागू होणारच नाही, आम्ही आयोगाच्या निर्णयाला सर्वोच्च न्यायालयात आव्हान दिले आहे. आता आमचा आणि त्यांचा संबंध नाही, असंही त्यांनी यावेळी सांगितलं. तसेच, मला राष्ट्रवादी कॉंग्रेसचे अध्यक्ष शरद पवार, मुख्यमंत्री नितीश कुमार आणि मुख्यमंत्री ममता बॅनर्जी यांनी फोन केला होता. यांच्याशी माझं बोलण झालं आहे. आता भाजपचा खरा चेहरा समोर आला आहे. आता लोकचं गद्दारांना धडा शिकवतील,' असा टोलाही ठाकरेंनी लगावला आहे.