Anurag Thakur News : ब्रिजभूषण सिंग यांच्यावर कारवाई होणार का? ; केंद्रीय मंत्री म्हणाले...

Mumbai News : केंद्रीय क्रिडा मंत्री व भाजप नेते अनुराग ठाकूर (Anurag Thakur) आज महाराष्ट्र दौऱ्यावर होते. आगामी लोकसभा निवडणुकींच्या (Lok Sabha Election) अनुषंगाने भाजपच्या विविध मंत्र्यांचा वेगवेगळ्या लोकसभा मतदारसंघाचा आढावा घेतला. त्या दृष्टीकोनातून मंत्री अनुराग ठाकूर (Anurag Thakur) आज उल्हासनगरमध्ये दाखल आले होते.यावेळी त्यांनी विविध मुद्द्यावर भाष्य केले.

भाजपचे खासदार ब्रिजभूषण सिंग (Brijbhushan Singh) यांच्याविरोधात महिला कुस्तीपटूंनी आरोप केले आहेत. यावेळी ठाकूर यांनी ब्रिजभूषण सिंग यांच्याबाबत प्रश्न विचारण्यात आला. यावरही त्यांनी भाष्य केले आहे.

यावेळी पत्रकार परिषेदेत मंत्री अनुराग ठाकूर यांना ब्रिजभूषण सिंग यांच्यावर कारवाई होणार का? असा प्रश्न विचारण्यात आला. यावर ठाकूर म्हणाले. "२०१४ च्या आधी खेळांसाठी जितकं बजेट होतं, त्याच्या तिप्पट बजेट आता केलं आहे. खेळाडूंसाठी अनेक चांगल्या सुविधा मोदी सरकारने उपलब्ध करून दिल्या आहेत. खेळाडूंनी ज्यांच्यावर आरोप केले त्यांच्यावर सगळ्यात आधी आमच्या सरकारने पावलं उचलली."

ठाकूर पुढे म्हणाले, "मी वैयक्तिक जाऊन त्यांना भेटलो, कमिटी स्थापन केली, कमिटीचा रिपोर्ट आल्यानंतर सब-कमिटी तयार केली, पोलिसांनी एफआयआर दाखल करून तपास केला. सुप्रीम कोर्टातही प्रकरण गेलं आहे. देशातला कायदा आपलं काम करतोय. तपास पूर्णपणे नि:पक्षपातीपणे होईल. चार्जशीट दाखल होईल आणि जे दोषी आढळतील त्यांच्यावर नक्कीच कारवाई होईल," असे स्पष्टीकरण ठाकूर यांनी दिले आहे.

यावेळी त्यांना भाजप - शिवसेना युतीत शिवसेनेला लोकसभा निवडणुकीत किती जागा मिळतील असाही प्रश्न विचारण्यात आला. यावर अनुराग ठाकूर म्हणाले, "हे तुम्ही किंवा मी ठरवू शकत नाही. पक्षाचे वरिष्ठ नेते ठरवतील. ती वेळ २०२४ मध्ये येईल, आत्ता ती वेळ नाही. जर आम्ही सगळी कामं आणि विकास एकत्र करत आहोत, तर हा निर्णय सुद्धा एकत्र बसून घेतला जाईल."