Uddhav Thackeray Bihar tour : नितीशकुमारांच्या मातोश्री भेटीनंतर उद्धव ठाकरे बिहारच्या राजधानीत; विरोधक एकत्र येणार?

Uddhav Thackeray Meet With Nitish Kumar : आगामी लोकसभा निवडणुकांच्या तयारीसाठी सर्वच राजकीय पक्षांकडून हालचाली सुरू आहेत. लोकसभा निवडणुकीच्या अनुषंगाने जागावाटप आणि मतदारसंघांची चाचपणी सर्वच राजकीय पक्षांकडून करण्यात येत आहे. भाजपकडून लोकसभेसाठी पुन्हा तीनशेपक्षा अधिकचा नारा देण्यात आला आहे, तर विरोधी पक्षांचीही मोट बांधण्याच्या हालचाली सुरू आहेत.

सर्व विरोधीपक्षांची एकत्रित येण्यासाठी घडामोडी घडताना दिसत आहेत. याच पार्श्वभूमीवर आता शिवसेना (ठाकरे गट) पक्षप्रमुख व माजी मुख्यमंत्री उद्धव ठाकरे आता बिहारची राजधानी पाटना येथे विरोधकांच्या बैठकीसाठी उपस्थित राहणार आहेत.

शिवसेना ठाकरे गटाचे नेते व खासदार संजय राऊत यांनी एक ट्विट करत याबाबत माहिती दिली आहे. विरोधी पक्षांची बैठक पार पडणार आहे. या बैठकीस उद्धव ठाकरे उपस्थित राहणार आहेत.

संजय राऊत ट्विटमध्ये म्हणतात की, "23 जून रोजी देशातील प्रमुख राजकीय पक्ष बिहारची राजधानी पाटण्यामध्ये एकत्र येत आहेत. हे देशभक्त पक्ष आहेत. 2O24 च्या सार्वत्रिक निवडणुकांच्या दृष्टीने ही आशादायी आणि ऐतिहासिक घटना आहे. आज बिहारचे मुख्यमंत्री नितीशकुमार यांनी याबाबत शिवसेना पक्षप्रमुख उद्धव ठाकरे यांच्याशी चर्चा केली.शिवसेना पक्षप्रमुख पाटणा येथील बैठकीस उपस्थित राहणार आहेत. ही फक्त सुरुवात आहे. संविधान आणि भारत मातेचे रक्षण करणे हे प्रत्येकाचे कर्तव्य आहे, असे संजय राऊत म्हणाले आहेत.

नितीश कुमारांची मुंबई दौरा -

बिहारचे मुख्यमंत्री नितीश कुमार यांनी नुकतीच उद्धव ठाकरे आणि राष्ट्रवादी काँग्रेसचे अध्यक्ष शरद पवार यांची मुंबईत भेट घेतली होती. नितीश कुमार यांचे मातोश्रीवर दाखल होणे, यालाही वेगळे राजकीय महत्त्व आहे. राष्ट्रीय स्तरावर विरोधकांची एकजूट होण्याची ही तयारी आहे, असे नितीशकुमार म्हणाले होते.

दरम्यान, आगामी लोकसभा निवडणुकीत भाजपविरोधात विरोधी पक्षांची मजबूत आघाडी बनवण्यासाठी हालचाली सुरू आहेत. त्यामुळे नितीश कुमार यांचा हा महाराष्ट्र दौरा आणि यानंतर आता विरोधकांच्या बैठकीला उद्धव ठाकरेंची पाटण्यात उपस्थिती लावणे, हे विरोधी एकजूट होण्याच्या दिशेने महत्त्वपूर्ण मानले जात आहे.