Maharashtra Political Crises: शिवसेनेच्या पक्षचिन्ह आणि नावासाठी दोन हजार कोटींचा सौदा; राऊतांचा गौप्यस्फोट

Maharashtra Political Crises केंद्रीय निवडणूक आयोगानं शिंदे गटाला शिवसेना (Shiv Sena) हे नाव आणि धनुष्यबाण हे चिन्ह देत ठाकरे गटाला मोठा धक्का दिला. यावरुन राज्यात राजकारण तापलं असताना ठाकरे गटाचे खासदार संजय राऊत यांनी निवडणूक आयोगावर निशाणा साधला आहे. शिवसेनेच चिन्ह आणि नाव मिळवण्यासाठी आता पर्यंत दोन हजार कोटींचा सौदा झाल्याचा आरोप राऊत यांनी केला आहे. इतकेच नव्हे हा प्राथमिक आकडा असून 100 टक्के सत्य असल्याचा दावाही त्यांनी केला आहे. ट्विट करत राऊतांनी या गौप्यस्फोट केला आहे.

"माझी खात्रीची माहिती आहे.... चिन्ह आणि नाव मिळवण्यासाठी आता पर्यंत 2000 कोटींचा सौदा आणि व्यवहार झाले आहेत... हा प्राथमिक आकडा आहे आणि 100 टक्के सत्य आहे.. बऱ्याच गोष्टी लवकरच उघड होतील.. देशाच्या इतिहासात असे कधीच घडले नव्हते.." असं ट्विट संजय राऊत यांनी केलं आहे.

शिवसेनेचं नाव आणि चिन्ह विकत घेतलं गेलयं हा न्याय नाहीये. हा न्याय विकत घेतला गेलाय. ही डील आहे. मी माझ्या मतावर ठाम आहे, हा विकत घेतलेलाच निर्णय़ आहे. असंही राऊतांनी म्हटलं आहे. हीच माहिती मला त्यांच्याच मित्रपरिवारातील बिल्डरांनी मला दिली आहे. आमदार खासदार नगरसेवक विकत घेऊन हे सरकार बनवलं गेलंय, आजही शहरानुसार नगरसेवकांचे भाव ठरवून विकत घेतले गेलेत. यासाठी गल्लीपासून दिल्लीपर्यंत चर्चा सुरु आहेत. २०१४ पासूनची प्रत्येक निवडणूक हेराफेरी करुन जिंकण्यात आली अशी माहिती समोर आली आहे. त्यावर आता सरकारने उत्तर द्यावं, अशी मागणीही त्यांनी केली आहे.

दरम्यान, निवडणूक आयोगाच्या निकालानंतर शिवसेना भवन आणि राज्यातील शाखा कुणाच्या ताब्यात जाणार असा प्रश्न उपस्थित होत असताना यावरही राऊत यांनी भाष्य केलं आहे. शिवसेनेच्या शाखा कुठेही जाणार नाहीत. उद्धव ठाकरे हेच आमचे सेनापती आहेत, असा विश्वास राऊतांनी व्यक्त केला. तसचं निवडणूक आयोगाचा निर्णय म्हणजे, शिवसेनेला संपवण्यासाठी वापरलेलं तंत्र आहे, असा आरोपही राऊतांनी केला होता.