राणा दांपत्यामुळे इतर रहिवाशीही आले अडचणीत!

मुंबई : खासदार नवनीत राणा (Navneet Rana) आणि आमदार रवी राणा (Ravi Rana) यांच्या खार येथील निवासस्थानातील अनधिकृत बांधकामावर पालिकेने (Mumbai Municipal Corporation) कारवाईचा इशारा दिला होता. पालिकेने त्यासाठी सात दिवसांची मुदत दिली होती, जी शुक्रवारी संपत आहे. या कारणाने आता राणा दांपत्याने न्यायालयात (Court) धाव घेतली आहे. हे बांधकाम अधिकृत करावे, अशी मागणी त्यांनी न्यायालयात केली. त्यामुळे या प्रक्रियेसाठी न्यायालयाने त्यांना एक महिन्याचा अवधी दिला असून पालिकेच्या कारवाईला तूर्तास ब्रेक लागला आहे. (Navneet Rana and Ravi Rana Latest Marathi News)

मुंबई महापालिकेने गेल्या आठवड्यात राणा दांपत्याला निवासस्थानातील अनधिकृत बांधकाम हटवण्याची अन्यथा पालिकेच्या कारवाईला सामोरे जाण्याचा नोटीस बजावली होती. या नोटिशीला आता आठवडा झाल्याने राणा दांपत्याने त्याविरोधात न्यायालयाचे दरवाजे ठोठावले आहे. तसेच घरातील बांधकाम अधिकृत करण्यासाठी न्यायालयाकडे मागणीही केली. त्यासाठीची प्रक्रिया पूर्ण करण्यासाठी न्यायालयाने त्यांना एक महिन्याचा अवधी दिल्याने त्यांना तूर्तास दिलासा मिळाला आहे.

मात्र, या कालावधीनंतर बांधकाम अधिकृत करण्यासाठी न्यायालयाने कोणतेही ठोस आदेश न दिल्यास आम्ही कारवाई करू, अशी माहिती एच वेस्ट विभागाचे सहायक आयुक्त विसपुते यांनी दिली आहे. मंजूर आराखड्याच्या तुलनेत अनधिकृत बदलांसाठी पालिकेने राणा यांना ही नोटीस बजावली.

त्यामध्ये लिफ्ट फ्लॅटमध्ये समाविष्ट करणे, पूजाघर स्वयंपाकघरात समाविष्ट करणे तसेच लॉबीचा भाग राहण्यासाठी वापरणे व दोन बेडरूम एकत्रित करणे, यांसारखे अनधिकृत बदल पालिकेच्या पाहणी दौऱ्यात अधिकाऱ्यांना आढळले आहेत. याच आराखड्याशिवायच्या बदलांसाठी पालिकेने आक्षेप घेत नोटीस बजावली होती. राणा दांपत्यासोबत आता पालिकेने इमारतीतील प्रत्येक माळ्यावरील रहिवाशांना नोटीस बजावली आहे.