Uddhav Thackeray News : ठाकरेंचं तेजस अस्त्र अ‍ॅक्टीव; साधला कार्यकर्त्यांशी संवाद

Shivsena : एकनाथ शिंदे (Eknath Shinde) यांच्या गटाला धनुष्यबाण चिन्हासह पक्षाचं नाव मिळालं. निवडणूक आयोगाने याबाबतचा निकाल शुक्रवारी (दि.17 फेब्रुवारी) दिला. त्यामुळे उद्धव ठाकरे गटाला मोठा धक्का बसला.

यानंतर आज शिवसैनिकांनी मोठ्या प्रमाणात मातोश्रीबाहेर गर्दी केली. या पार्श्वभूमीवरच उद्धव ठाकरे यांनी मातोश्रीबाहेर येऊन शिवसैनिकांना संबोधित केले.

निवडणूक आयोगाच्या निर्णयानंतर ठाकरे अॅक्शन मोडमध्ये आले असल्याचे दिसत आहे. ठाकरे यांनी मातोश्री निवासस्थानाबाहेर सनरुफ कारमधून शिवसैनिकांना संबोधित केलं. यावेळी त्यांचे धाकटे सुपुत्र तेजस ठाकरेही त्यांच्याबरोबर होते. तसेच ते तेथील सर्व व्यवस्था करतानाही दिसले. त्यामुळे आता तेजस ठाकरेही मैदानात उतरल्याची चर्चा सुरू झाली आहे.

''आपलं शिवधनुष्य चोरीला गेलंय. या चोरांना आपण सर्वांनी धडा शिकवू. मी या चोरांना आव्हान देतो तुम्ही चोरलेला धनुष्यबाण घेऊन निवडणुकीला सामोरे या. त्यानंतर पाहू जनता कुणाला निवडते?'', असं थेट आव्हान ठाकरेंनी शिंदे गटाला दिले. यावेळी कलानगर परिसरात शिवसैनिकांनी मोठी गर्दी केली होती.

एकीकडे ठाकरेंची अनेकांनी साथ सोडली. मात्र, उद्धव ठाकरे यांच्या पाठिशी त्यांचे धाकटे सुपुत्र तेजस ठाकरे हे देखील राजकारणात सक्रिय होण्याची शक्यता आहे. आजपर्यंत तेजस ठाकरे हे राजकारणात जास्त दिसले नाहीत. मात्र, आता ते आदित्य ठाकरे यांच्या प्रमाणे राजकीय रणांगणात उतरणार असल्याची चर्चा रंगली आहे.

दरम्यान, याआधी अनेकवेळा तेजस ठाकरे यांनी राजकारणात सक्रिय व्हावं, अशा आशयाचे बॅनर कितीतरी वेळा लागल्याचे पाहायला मिळाले होते. त्यानंतर आज उद्धव ठाकरे यांच्याबरोबर ते दिसल्याने राजकारणात सक्रिय होण्याची चर्चा रंगली आहे.

उद्धव ठाकरे नेमकं काय म्हणाले?

''आज महाशिवरात्र आहे. पण आपलं शिवधनुष्य चोरीला गेलंय. या चोरांना आपण सर्वांनी धडा शिकवू. मी या चोरांना आव्हान देतो तुम्ही चोरलेला धनुष्यबाण घेऊन निवडणुकीला सामोरे या. त्यानंतर पाहू जनता कुणाला निवडते?'', असं आव्हान ठाकरे यांनी दिलं.

दरम्यान, ठाकरेंनी शिवसैनिकांना निवडणुकीच्या तयारीला लागण्याचे आवाहन केले आहे. तसेच मी खचलेलो नाही आणि खचणारही नाही. हा शिवसेना संपवण्याचा डाव आहे, असा आरोपही यावेळी ठाकरेंनी केला. दरम्यान, मातोश्रीबाहेर येऊन ठाकरे यांनी शिवसैनिकांना संबोधित केलं. यावेळी मातोश्रीबाहेर शिवसैनिकांनी मोठी गर्दी केली होती.