Rohit Pawar News : ...म्हणून राष्ट्रवादी काँग्रेसच मोठा भाऊ; रोहित पवारांनी सांगितलं कारण

Rohit Pawar on MVA : भाजपच्या विरोधात लोकांचा रोष आहे. त्यामुळे सर्वजण एकत्र येऊन लढणार आहोत. महाविकास आघाडीत कोणतेही मतभेद आणि मनभेद नाहीत. वज्रमूठ सभा जूनमध्ये होतील. आम्हाला उन्हातानात सभा करायची नाही. आम्ही जूनमध्ये काळजी घेऊन आणखी मोठ्या सभा घेणार असल्याची माहिती राष्ट्रवादी काँग्रसचे आमदार रोहित पवार यांनी दिली. याचवेळी त्यांनी महाविकास आघाडीत राष्ट्रवादी काँग्रेसच मोठा भाऊ असल्याचा दावाही केला. याचे कारणही यावेळी पवार यांनी स्पष्ट केले.

काही दिवसांपासून महाविकास आघाडीतील (MVA) घटक पक्षांत जागावाटपावरून चर्चा सुरू आहेत. त्यातच सध्या असलेल्या आमदारांच्या संख्येवरून शिवसेना (ठाकरे गट) काँग्रेस (Congress) आणि राष्ट्रवादी काँग्रेसमध्ये रस्सीखेच सुरू आहे. प्रत्येकजण मीच मोठा भाऊ असल्याचा दावा करताना दिसत आहे. सध्या ठाकरे गटाचे १६, राष्ट्रवादी काँग्रेस ५४ आणि काँग्रेसचे ४४ आमदार आहेत. त्यावरून विरोधी पक्षनेते अजित पवार यांनी राष्ट्रवादी काँग्रेसच (NCP) मोठा भाऊ असल्याचा दावा केला आहे.

महाविकास आघाडीत 'मोठा भाऊ कोण' यावरून सुरु असलेल्या कलगीतुऱ्यात आता राष्ट्रवादी काँग्रेसचे आमदार रोहित पवार (Rohit Pawar) यांनी उडी घेतली आहे. त्यांनी अजित पवारांचे वक्तव्य एका अर्थाने बरोबर असल्याचे सांगून मोठ्या भावाचा खरा अर्थही सांगितला आहे. त्यानुसारही राष्ट्रवादी काँग्रेसच मोठा भाऊ ठरत असल्याचा दावाही रोहित यांनी केला आहे.

रोहित पवार म्हणाले, "अजितदादा (Ajit Pawar) आकड्यांवर बोलतात. राष्ट्रवादीचा आकडा आजही काही पक्षांपेक्षा मोठा आहे. त्यामुळे राष्ट्रवादी काँग्रेसला मोठा भाऊ बोलणे योग्य आहे. मात्र जेव्हा आपण मोठा भाऊ म्हणतो तेव्हा ती व्यक्ती आपण मार्गदर्शक समजतो. महाविकास आघाडीत राष्ट्रवादी काँग्रेसचे शरद पवार (Sharad Pawar) मोठे मार्गदर्शक आहेत. त्यामुळे मोठा भाऊ राष्ट्रवादीकडेच आहे. आता याचा अर्थ असा नाही की आम्ही जास्त जागा मागणार किंवा कमी मागणार. मात्र राष्ट्रवादी मोठा भाऊ आहे असे म्हणणे योग्य आहे."

(Edited by Sunil Dhumal)