सायरस मिस्त्री यांच्या अपघाती निधनाने धक्का; मुख्यमंत्री शिंदेंनी व्यक्त केलं दु:ख

मुंबई : मुंबई-अहमदाबाद महामार्गावर झालेल्या भीषण अपघातात उद्योजक सायरस मिस्त्री यांचे निधन झालं आहे. सायरस यांच्या निधनानंतर विविध क्षेत्रातील दिग्गजांकडून आदरांजली वाहिली जात असताना महाराष्ट्राचे मुख्यमंत्री एकनाथ शिंदे (Eknath Shinde) यांनीही दु:ख व्यक्त व्यक्त केलं आहे. (Cyrus Mistry Passes Away News)

मुख्यमंत्री शिंदे यांनी आपल्या ट्वीटमध्ये म्हणाले की, टाटा सन्सचे माजी प्रमुख सायरस मिस्त्री यांच्या निधनाचे वृत्त ऐकून धक्का बसला आहे. सायरस मिस्त्री हे केवळ एक यशस्वी उद्योजक नव्हते तर उद्योग विश्वातील एक तरुण, उमदे आणि भविष्यवेधी व्यक्तिमत्त्व म्हणून त्यांच्याकडे पाहिले जात होते. एक कर्तबगार उद्योजक आपल्यातून गेला आहे. ही केवळ मिस्त्री कुटुंबियांची नव्हे तर देशातील उद्योग विश्वाची मोठी हानी आहे. माझी त्यांना भावपूर्ण श्रद्धांजली,”अशा भावना मुख्यमंत्री शिंदेंनी व्यक्त केल्या आहेत.

भाजप नेते आणि राज्याचे उपमुख्यमंत्री देवेंद्र फडणवीस यांनीही सायरस मिस्त्री यांच्या निधनानंतर दु:ख व्यक्त केलं. 'पालघरजवळ झालेल्या दुर्दैवी अपघातात टाटा सन्सचे माजी चेअरमन सायरस मिस्त्री यांचे निधन झाल्याची बातमी कळताच धक्का बसला. त्यांच्या कुटुंबियांप्रती मी संवेदना व्यक्त करतो,' असे ट्वीट फडणवीस यांनी केलं आहे. याबरोबरच या अपघाताबाबत पोलीस महासंचालकांसोबत चर्चा झाली असून या अपघात प्रकरणी चौकशीचे आदेश देण्यात आल्याचेही त्यांनी सांगितले आहे.

दरम्यान, सायरस मिस्त्री हे आपल्या कारने तीन मित्रांसह मुंबई-अहमदाबाद महामार्गावरून मुंबईकडे येत होते. यावेळी ते पालघरजवळील चारोटी या ठिकाणी चारोटी नाक्याजवळ चालकाचं नियंत्रण सुटल्यामुळे भरधाव कार नदीच्या पुलाला जाऊन धडकली. या धडकेत गंभीर जखमी झालेल्या सायरस मिस्त्रींचा मृत्यू झाला. मिस्त्री यांच्यासोबत असलेल्या पंडोले नामक व्यक्तीचाही या अपघातात मृत्यू झाला आहे, तर इतर दोन सहकारी गंभीर जखमी झाले आहेत. या प्रकरणी अधिक तपास पालघर पोलिस करीत आहेत.

दरम्यान, अनेक दिग्गजांकडून सायरस यांच्या मृत्यू बद्दल दु:ख व्यक्त केलं जात आहे.