शिवसेना शाखेचा वाद चिघळला; पोलिसांची ठाकरे गटाला नोटीस...

डोंबिवली : डोबिवली शिवसेना शाखेवर ताबा मिळविण्यासाठी शिंदे व ठाकरे गटाकडून जोरदार प्रयत्न सुरु होते. दोन महिन्यांपूर्वी दोन्ही गटात तुफान राडेबाजीनंतर दिवाळी पार पडताच बाळासाहेबांची शिवसेनेच्या कार्यकर्त्यांनी शिवसेना मध्यवर्ती शाखेवर गुरुवारी ताबा मिळविला.

करारनामा केला असल्याचे सांगत शिंदे गटाने शाखा ताब्यात घेतली आहे. शाखेचा वाद आता कागदपत्रांवर गेला असून पोलिसांनी ठाकरे गटाला नोटीस पाठवित त्यांच्याजवळील कागदपत्र सादर करण्यास सांगितले आहे. (Shivsena , Dombiwali Latest News)

शिवसेना कोणाची यावरुन शिंदे व ठाकरे गटातील वाद असून सध्या हे प्रकरण न्यायप्रविष्ठ आहे. शिवसेना आमची हा दावा शिंदे व ठाकरे गटाने केल्यानंतर शहरातील शाखा ताब्यात घेण्यावरुन वाद निर्माण झाले होते. त्यानंतर दोन्ही गटांत सामंजस्य होऊन डोंबिवलीतील शाखेचे दोन गटात विभाजन करण्यात आले. दिवाळी पर्यंत सारेकाही आलबेल असताना दिवाळी संपल्यानंतर दुसऱ्याच दिवशी गुरुवारी सकाळी 9 च्या दरम्यान शिंदे गट समर्थकांनी डोंबिवली मध्यवर्ती शाखेवर ताबा घेतला.

यावेळी आमचा वर्धमान कंपनीशी करार झाला असून कायदेशीर रित्या शाखेवर आता आमचा ताबा असल्याचे शिंदे गटाकडून सांगण्यात आले. यावेळी ठाकरे समर्थकांना शाखेतून चक्क बाहेर काढण्यात आले. रामनगर पोलिसांनी येथे कोणतीही वादाची परिस्थिती निर्माण होऊ नये म्हणून पोलिस बंदोबस्त तैनात केला होता. ठाकरे व शिंदे समर्थक काहीसे आपसात भिडल्यानंतर पोलिसांनी ठाकरे समर्थकांना पोलिस ठाण्यात घेऊन गेले होते. यानंतर आता पोलिसांनी ठाकरे समर्थकांना नोटीस पाठविली आहे.

डोंबिवली मध्यवर्ती शिवसेना शाखेच्या मालकी हक्कावरुन शिवसेना उद्धव बाळासाहेब ठाकरे व बाळासाहेबांची शिवसेना असे दोन पक्षामध्ये वाद निर्माण झाले आहेत. दोन पक्षातील वादावरुन कायदा व सुव्यवस्थेचा प्रश्न निर्माण होण्याची शक्यता निर्माण झाली आहे.

त्यामुळे आपल्याकडे डोंबिवली शहर शिवसेना (Shivsena) मध्यवर्ती शाखेच्या जागे संदर्भात काही कागदपत्रे असल्यास, आपण सदरची कादगपत्रे चौकशी कामी तीन दिवसांत रामनगर पोलीस ठाणे येथे सादर करावीत, अशी नोटीस ठाकरे गटाचे डोंबिवली शहर प्रमुख विवेक खामकर यांना पाठविली आहे.