शिवसेना हाय अलर्टवर : मतदानात चूक अथवा दगाफटका केल्यास आमदारांवर कडक कारवाई

मुंबई : विधान परिषद निवडणुकीच्या (Legislative Council Election) पार्श्वभूमीवर शिवसेना (Shivsena) हाय अलर्टवर आली आहे. राज्यसभा निवडणुकीत दोन दिवस कार्यशाळा घेऊनही चुका आणि दगाफटका झाला होता. त्याची पुनरावृत्ती विधान परिषद निवडणुकीत होऊ नये, यासाठी शिवसेनेकडून पुरेपूर दक्षता घेतली जात आहे. ‘या वेळी जर कोणत्या आमदाराने मतदान करताना चूक केली तसेच, जर कोणत्या नेत्याने दगाफटका केल्यास कडक कारवाई करण्यात येणार आहे, असे शिवसेनेच्या ज्येष्ठ नेत्याकडून सांगण्यात आले. (Shiv Sena will take strict action against MLAs if they make a mistake while voting)

राज्यसभा निवडणुकीत पुरेशी काळजी घेऊन आणि हातात बहुमत असूनही शिवसेना उमेदवार संजय पवार यांना पराभूत व्हावे लागले होते. त्या निवडणुकीत झालेल्या चुका टाळण्यासाठी पक्षाकडून योग्य ती काळजी घेण्यात येत आहे. राज्यसभा निवडणुकीत मतदानाची दाेन दिवस कार्यशाळा घेऊनही काहींची मते बाद झाल्याने पक्षनेतृत्वाकडून नाराजी व्यक्त करण्यात येत आहे. तसेच, दगाफटका झाल्याने नेतृत्व आता सावध झाले आहे, त्यामुळे एखाद्या आमदाराने मतदान करताना चूक केली अथवा दगाफटका केला तर त्याच्यावर कडक कारवाईचा इशारा शिवसेनेने दिला आहे.

विधान परिषद निवडणुकीत जर कोणत्या आमदाराने मतदान करताना चूक केली, तसेच कोणत्या नेत्याने दगाफटका केल्यास कडक कारवाई करणार असल्याचे शिवसेनेच्या ज्येष्ठ नेत्यांकडून सांगण्यात आले. राज्यसभा निवडणुकीत नाशिक जिल्ह्यातील आमदार सुहास कांदे यांनी जाणीवपूर्वक चूक केली की अनावधानाने झाली, याची शिवसेनेची समिती चौकशी करत आहे.

आमदार सुहास कांदे यांच्या एका मताचा शिवसेनेला फटका बसला आहे. तसेच, महाविकास आघाडीतील सर्व पक्षाच्या आमदारांची दोन दिवस सातत्याने कार्यशाळा घेऊन चूक झालीच कशी? असा प्रश्न नेतृत्वाला सतावत आहे. या संदर्भात पक्षांतर्गत चौकशी केली जात आहे.

दरम्यान, राज्यातील काँग्रेसचे नेते आणि आमदारांची बैठक सायंकाळी पाच वाजता होणार आहे. ही बैठक विधान भावनाऐवजी हॉटेल फोर सिझनमध्ये होणार आहे, अशी माहिती सूत्रांनी दिली.