ठाकरेंचे विश्वासू वरुण सरदेसाई नागपुरात दिसले; फडणवीसांसोबतचा फोटो व्हायरल

मुंबई : राज्यात सुरू असलेल्या सत्तानाट्यापासून दूर असलेले शिवसेनेच्या (Shiv Sena) युवा सेनेचे सचिव वरुण सरदेसाई मंगळवारी नागपुरात होते. ते नागपूर विमानतळावर उपमुख्यमंत्री देवेंद्र फडणवीस यांना भेटल्याचीही चर्चा आहे. दोघेजणांच्या हस्तांदोलनाचा फोटो सोशल मीडियात व्हायरल झाला आहे. (Varun Sardesai Latest Marathi News)

मुख्यमंत्री एकनाथ शिंदे (Eknath Shinde) यांच्यासह शिवसेनेतील 40 आमदारांनी बंड केल्यानंतर महाविकास आघाडी सरकार कोसळलं. शिवसेना फुटीच्या उंबरठ्यावर आहे. पक्ष कठीण काळातून जात असताना ठाकरे कुटुंबीयांचे अत्यंत विश्वासू मानले जाणारे वरुण सरदेसाई मात्र मुंबईत दिसले नाहीत. सोशल मीडियातही सक्रीय नाहीत. त्यामुळे चर्चांना उधाण आले असून आता ठाकरेंच्या विरोधकांनीही त्यावर बोट ठेवलं आहे.

त्यातच त्यांचा एक फोटो सोशल मीडियात व्हायरल झाला आहे. नागपूर विमानतळावरील हा फोटो असल्याचे सांगितले जात आहे. उपमुख्यमंत्रिपदी विराजमान झाल्यानंतर फडणवीस मंगळवारी पहिल्यांदाच नागपुरात आले. यावेळी नागपूर विमानतळावर सरदेसाई व फडणवीस भेटल्याचे समजते. दोघांचा हस्तांदोलनाचा एक फोटो समोर आला आहे. पण या भेटीबाबत अद्याप अधिकृत माहिती समोर आलेली नाही.

शिवसेना फुटीच्या उंबरठ्यावर असताना वरुण सरदेसाई मुंबईत दिसलेच नाही. ठिकठिकाणी आंदोलन झाले, पण सरदेसाई आदित्य ठाकरेंसोबतही समोर आले नाहीत. मागील 20 दिवसांपासून ट्विटर व फेसबुकवर त्यांची एकही पोस्ट नाही. त्यामुळे राजकीय वर्तुळात चर्चांना उधाण आलं आहे.

दरम्यान, वरुण सरदेसाई यांनी मंगळवारी नागपूर येथे नागपुर विद्यापीठ सिनेट निवडणूक संदर्भात रविभवन नागपुर येथे युवा सेनेची आढावा बैठक घेतल्याचेही समोर आले आहे. नागपुर युवासेना जिल्हा युवती अधिकारी प्रा. माधुरी पालीवाल यांनी याबाबतचे ट्विट केले आहे.

भाजपचे आमदार नितेश राणे (Nitesh Rane) यांनी सरदेसाईंबाबत ट्विट करत सवाल उपस्थित केला आहे. 'तो 'माजी' सरकारी भाचा, 'Mr. India' झाला आहे का?,' असं राणेंनी ट्विटमध्ये म्हटलं आहे. तसेच एका व्हिडीओच्या माध्यमातून त्यांनी सरदेसाई यांच्यावर गंभीर आरोपही केले आहेत. भाच्यानेच उद्धव ठाकरे यांना दगा दिल्याचे राणे यांनी म्हटलं आहे