निधी मिळूनही तुम्ही का रडता ? ; खैरेंचा शिरसाटांना सवाल

औरंगाबाद : शिवसेनेत बंड झाल्यानंतर बुधवारी मुख्यमंत्री उद्धव ठाकरे यांनी फेसबुक लाईव्हच्या माध्यमातून सर्व आमदारांना भावनिक आवाहन केलं होतं. पण उद्धव ठाकरे यांच्या या आवाहनाला शिवसेना (Shiv Sena) आमदार संजय शिरसाट (Sanjay Shirsat) यांनी सडेतोड उत्तर दिलं. त्यांनी उद्धव ठाकरे यांना लिहिलेल्या पत्राची गुरुवारी दिवसभर सोशल मीडियावर चर्चा झाली. (Chandrakant Khaire latest news)

"शिवसेना आमदारांना निधी मिळत नाही, आमच्या मतदारसंघातले लोक विचारायचे की मुख्यमंत्री आपला आहे ना मग आपल्या विरोधकांना निधी कसा मिळतो?,” असे त्यांनी आपल्या पत्रात म्हटलं आहे.

शिरसाट यांच्या पत्राला शिवसेनेचे ज्येष्ठ नेते चंद्रकांत खैरे (Chandrakant Khaire) यांनी सडेतोड उत्तर दिलं आहे. "आमदार संजय शिरसाट आठवड्यातून 5 दिवस मुंबईत असतात. त्यांना हजारो कोटींचा निधी मिळाला तरीही ते म्हणतात आम्हाला निधी नाही.निधी मिळूनही तुम्ही का रडता ? का उद्धव साहेबांना सोडता ? रसद मिळाली म्हणून मागे लागतात का? मातोश्रीवर या, कुणी तुम्हाला रागावणार नाही, तुम्हला सन्मानपूर्वक पुन्हा साहेब घेतील," असे खैरे म्हणाले. ते माध्यमांशी बोलत होते.

शिरसाट यांनी आपल्या पत्रात म्हटलं आहे की, साहेब, जेव्हा आम्हाला वर्षावर प्रवेश मिळत नव्हता, तेव्हा खरे विरोधक काँग्रेस आणि राष्ट्रवादीचे लोक तुम्हाला नियमित भेटत होते. मतदरासंघातली काम करीत होते.निधी मिळाल्याची पत्र नाचवत होते. भुमीपुजन आणि उद्घाटनं करत होते. तुमच्यासोबत काढलेले फोटो सोशल मीडियावर व्हायरल करत होते. त्यावेळी आमच्या मतदारसंघातले लोक विचारायचे की मुख्यमंत्री आपला आहे ना मग आपल्या विरोधकांना निधी कसा मिळतो?,”

“त्यांची काम कशी होतात? तुम्ही आम्हाला भेटतच नव्हता तर आम्ही मतदारांना उत्तर काय घ्यायचं या विचाराने जीव कासावीस व्हायचा,” अशी खंत संजय शिरसाट यांनी पत्रात व्यक्त केली आहे. संजय शिरसाट हे एकनाथ शिंदेंसोबत गेलेल्या बंडखोर आमदारांपैकी एक आहेत. त्यांनी उद्धव ठाकरे यांना लिहिलेल्या पत्राची गुरुवारी दिवसभर सोशल मीडियावर चर्चा झाली.