शिवसेना अन्‌ बाळासाहेब ठाकरेंचे नाव कोणालाही वापरता येणार नाही : राष्ट्रीय कार्यकारिणीत ठराव

मुंबई : शिवसेना (shivsena) आणि बाळासाहेब ठाकरे (Balasaheb Thackeray) यांचे नाव कोणालाही वापरता येणार नाही, असा महत्वपूर्ण ठराव शिवसेनेच्या राष्ट्रीय कार्यकारिणीच्या बैठकीत घेण्यात आला. तसे पत्र शिवसेनेकडून निवडणूक आयोगाला देण्यात आलेले आहे. याशिवाय गद्दारांवर कारवाई करण्याचे अधिकार शिवसेना पक्षप्रमुख उद्धव ठाकरे (Uddhav Thackeray) यांना देण्यात आले आहेत. यासह इतर पाच ठराव या बैठकीत करण्यात आलेले आहेत. यामुळ एकनाथ शिंदे (Eknath shinde) यांच्यासह बंडखोर आमदारांची मोठी अडचण झाली आहे. (Shiv Sena and Balasaheb Thackeray's name cannot be used by anyone : Resolution in National Executive)

एकनाथ शिंदे यांच्या गटाने गुवाहाटीत बैठक घेत आपल्या पक्षाचे नाव शिवसेना-बाळासाहेब ठाकरे असे ठेवण्यात आले हेाते. त्यानंतर झालेल्या शिवसेनेच्या राष्ट्रीय कार्यकारिणीच्या बैठकीत वरील ठराव करण्यात आला आहे. त्यामुळे शिंदे गटाची मोठी अडचण आहे. त्यांनी आपल्या पक्षाचे नाव शिवसेना-बाळासाहेब ठाकरे असे ठेवले आहे.

मुंबईत शिवसेना भवनात मुख्यमंत्री उद्धव ठाकरे यांच्या नेतृत्वाखाली राष्ट्रीय कार्यकारिणीची बैठक झाली. त्यात हा निर्णय घेण्यात आलेला आहे. दरम्यान, या राष्ट्रीय कार्यकारिणीच्या बैठकीस माजी खासदार आनंद अडसूळ, माजी मंत्री रामदास कदम गैरहजर होते. याच बैठकीत सोळा आमदारांचे निलंबन करण्याची मागणी विधानसभा उपाध्यक्षांकडे केली आहे. शिवसेनेच्या राष्ट्रीय कार्यकारिणीत उद्धव ठाकरे, आदित्य ठाकरे, सुभाष देसाई, दिवाकर रावते, लीलाधर डाके, रामदास कदम, संजय राऊत, सुधीर जोशी, अनंत गीते, एकनाथ शिंदे, चंद्रकांत खैरे आणि आनंदराव अडसूळ यांचा समावेश आहे.

या कार्यकारिणीमध्ये सहा ठराव करण्यात आलेले आहेत. त्यामध्ये शिवसेना ही बाळासाहेब ठाकरे यांची होती, आहे आणि ती कायम राहील. शिवसेना पक्षप्रमुख उद्धव ठाकरे यांच्या नेतृत्वावर राष्ट्रीय कार्यकारिणीचा विश्वास, पक्षात निर्णय घेण्याचे सर्वाधिकार हे उद्धव ठाकरे यांना असतील. शिवसेनेशी गद्दारी करणाऱ्यांवर कठोर कारवाईचे पक्षप्रमुख उद्धव ठाकरे यांना अधिकार देण्यात आले आहेत. बाळासाहेब ठाकरे आणि शिवसेना हे नाव अन्य कोणालाही वापरता येणार नाही, हा महत्वाचा ठराव या बैठकीत करण्यात आलेला आहे. तशी मागणी निवडणूक आयोगाकडे शिवसेनेकडून करण्यात आलेली आहे. शिवसेनेची मराठी अस्मितेशी आणि हिंदुत्वाशी बांधिलकी कायम राहील. याशिवाय मुख्यमंत्री म्हणून उद्धव ठाकरे यांनी केलेले काम याबद्दल त्यांच्या अभिनंदनाचा ठरावही यावेळी करण्यात आला. असे सहा ठराव या बैठकीत करण्यात आलेले आहेत.

शिवसेनेच्या राष्ट्रीय कार्यकारिणी समितीच्या बैठकीत बंडखोर नेते एकनाथ शिंदे यांच्यावर कोणतीही कारवाई करण्यात आलेली नाही. त्यांना अभय देत शिंदे यांचे नेतेपदावरील निवड कायम ठेवलेली आहे. याशिवाय पक्षविरोधी कारवाईमुळे चर्चेत आलेले रामदास कदम यांच्यावरही पक्षाने कोणतीही कारवाई केलेली नाही. एकीकडे बंडखोरांना अभय देताना १६ आमदारांवर अपात्रेतची कारवाई करण्यासाठी विधानसभा उपाध्यक्ष नरहरी झिरवळ यांना पत्र देण्यात आलेले आहे.