Shiv Sena : 'मातोश्री' वरील शिवसेना महिला नेत्याचा तो Video Viral ; गुन्हा दाखल

Sheetal Mhatre video viral : शिवसेनेच्या नेत्या शीतल म्हात्रे यांचा एक व्हिडिओ सध्या व्हायरल होत आहे. 'मातोश्री'नावाच्या फेसबूकपेजवरुन हा व्हिडोओ शेअर करण्यात आला होता. या व्हिडिओवरुन शिवसैनिक आक्रमक झाले आहेत.

शिवसेनेच्या प्रवक्त्या शीतल म्हात्रे यांनी याप्रकरणी दहिसर पोलिस ठाण्यात गुन्हा दाखल करण्यात आला आहे. याप्रकरणी पोलिसांनी एकाला अटक केली आहे. पोलिस इतरांचाही शोध घेत आहेत. मुख्यमंत्री एकनाथ शिंदे यांच्या रॅलीमधील हा व्हिडिओ आहे.

या रॅलीत आमदार प्रकाश सुर्वे आणि शीतल म्हात्रे सहभागी झाले होते. या दोघांचा व्हिडिओ मॉर्फ करुन तो व्हायरल करण्यात आला आहे. या व्हिडिओवर अश्लिल मजकूर टाकण्यात आला आहे. त्यामुळे दहिसरमध्ये शिवसैनिकांकडून संताप व्यक्त करण्यात येत आहे.

शीतल म्हात्रे यांनी मातोश्री नावाच्या पेजवर हा व्हिडिओ मॉर्फ करून घाणेरडा मजकूर लिहून व्हायरल केल्याचा आरोप केला आहे.

या मॉर्फ व्हिडीओची माहिती मिळाल्यानंतर आमदार प्रकाश सुर्वे यांचा मुलगा राज सुर्वे हा मध्यरात्री कार्यकर्त्यांसह दहिसर पोलिस ठाण्यात पोहोचला होता. शिवसैनिकांनी येथेरात्रभर गोंधळ घातल्याचे समोर आले आहे. पोलिसांनी या प्रकरणी तक्रार नोंदवून घेतली आहे.

या व्हिडिओबाबत शीतल म्हात्रे म्हणाल्या, "सोशल मीडियावरील मातोश्री नावाच्या अकांऊटमधून हा व्हिडिओ व्हायरल करण्यात आला आहे. मातोश्री नावाच्या पेजवरुन महिलेची अशी बदनामी करणे, विरोधकांना शोभते का?, विरोधक एवढ्या खालच्या पातळीवर जातील, असे वाटले नव्हते,"