Sharad Pawar News: शरद पवार आता म्हणाले : मी तसं बोललोच नाही...

Satara Political News: राष्ट्रवादी काँग्रेसमध्ये फूट पडल्यानंतर पक्षाध्यक्ष शरद पवार आणि बंडखोरी करून शिंदे-फडणवीसांच्या सत्तेत गेलेले उपमुख्यमंत्री अजित पवार काही दिवसांआधी सभांतून समोरासमोर आले. मात्र, पक्षात फूट नसून, अजितदादा आमचेच नेते असल्याचे पक्षाध्यक्ष शरद पवारांनी आज सांगितले. या विधानाने उलट-सुलट चर्चा रंगली असतानाच, पवारांनी खुलासा करत 'अजित पवार आमचे नेते, असे म्हटले नसल्याचेच स्पष्ट केले.

काय बोलले होते शरद पवार?

"राष्ट्रवादी काँग्रेस पक्षात फूट नाही. उपमुख्यमंत्री अजित पवार हे आमचेच नेते आहेत. याला फूट कशी म्हणता येईल. जर पक्षातील एक मोठा गट वेगळा झाला तर पक्षात फूट पडते. देशपातळीवर अशी स्थिती राष्ट्रवादीत नाही," असं विधान राष्ट्रवादी काँग्रेसचे अध्यक्ष शरद पवार यांनी बारामतीत बोलताना केलं होते. सुप्रिया सुळे आणि अजित पवार दोघे भाऊ बहिण आहेत, त्या अर्थी ते विधान होतं. पहाटेच्या शपथविधीवेळी संधी दिली होती, आता परत संधी द्यायची नसते.

"पक्ष सोडून काही लोकांनी वेगळी भूमिका घेतली, तो लोकशाहीमध्ये त्यांचा अधिकार आहे. त्यांनी निर्णय घेतला म्हणून लगेच पक्षात फूट पडली, असं म्हणायचं काही कारण नाही," असही पवार यांनी नमुद केले होते.

दरम्यान, गुरूवारी खासदार सुप्रिया सुळे यांनीही असंच विधान केल्यामुळे राजकीय वर्तुळातही एकच चर्चा रंगली होती. "अजित पवार हे आमच्या पक्षातील ज्येष्ठ नेते आहेत, त्यांनी पक्षाविरोधात भूमिका घेतली असल्याने त्याबाबत विधानसभा अध्यक्षांकडे तक्रार केली आहे," असं सुप्रिया सुळे म्हणाल्या होत्या.

त्यानंतर, सुळेंच्या वक्तव्याला आज शरद पवारांनी दुजोरा दिला होता. "राष्ट्रवादीत फूट पडलेली नाही, आमच्यातील काही लोकांनी वेगळी भूमिका घेतली असली तरी आमचा पक्ष एकच आहे. अजित पवार हे आमच्याच पक्षाचे नेते असल्याचा दावाही खासदार सुळे यांनी केला.

Edited By- Anuradha Dhawade