कारागृहाबाहेर पडल्यावर राऊतांची शिवसेना स्टाईलमध्ये पहिली प्रतिक्रिया, म्हणाले...

Sanjay Raut:पत्राचाळ गैरव्यवहार प्रकरणी शिवसेनेचे (उद्धव बाळासाहेब ठाकरे) खासदार संजय राऊत यांना तब्बल शंभर दिवसानंतर आर्थर रोड कारागृहाबाहेर आले आहेत. त्यांना आज (ता.९ नोव्हेंबर) ईडीच्या (ED) पीएमएलए कोर्टातून त्यांना जामीन मिळाला आहे.

त्यामुळे त्यांचा कारागृहाबाहेर पडण्याचा मार्ग मोकळा झाला होता. राऊत यांची कारागृहातून सुटका झाल्यावर त्यांनी माध्यमांना आपली पहिली प्रतिक्रिया शिवसेनेच्या स्टाईलने दिली आहे. (sanjay raut Latest News)

दरम्यान, न्यायालयाच्या या निर्णयाविरोधात ईडीने विरोध करत हायकोर्टात अपील केलं होतं त्यामुळे यावर आज पुन्हा दुपारी हायकोर्टात सुनावणी झाली. यावेळी ईडीने राऊतांच्या जामिनास स्थगितीची मागणी केली होती. मात्र न्यायालयाने त्यांची ही मागणी फेटाळत त्यांच्या जामिनाच्या स्थगितीस नकार दिला आहे. यामुळे राऊतांचा आज घरी जाण्याचा मार्ग मोकळा झाला होता.

कारागृह प्रशासनाने कागदपत्राची औपचारीकता पुर्ण करत संजय राऊतांना कारागृहाबाहेर सोडले. यावेळी शिवसैनिकांनी हजारोंच्या संख्येंनी गर्दी करत मोठा जल्लोष केला आणि फटाक्यांची आतषबाजी करत कोण आला रे..कोण आला..शिवसेनेचा वाघ आला..,अशा घोषणांनी यावेळी कारागृह परिसर दणाणला होता. संजय राऊत यांच्यासोबत यावेळी त्यांचे बंधू आमदार सुनिल राऊत होते.

यावेळी राऊतांनी शिवसैनिकांना हात उंचावून अभिवादन करत विययी मुद्रा दाखवली. यावेळी शिवसैनिक कमालीचे भावूक झाले होते. यानंतर त्यांनी आपली पहिली प्रतिक्रिया माध्यमांना दिली असून सुटल्याचा आनंद आहे. न्यायालयावरील विश्वास वाढला, आम्ही लढणारे आहोत लढत राहू. तब्येत चांगली नसल्याने नंतर सविस्तर प्रतिक्रिया देणार असल्याचे त्यांनी सांगितले.

दरम्यान, आता संजय राऊत (Sanjay Raut) आपल्या घरी जाणार की 'मातोश्री'वर जाणार याबाबत अद्याप माहिती मिळाली नाही. मात्र ते आज संध्याकाळी पक्षप्रमुख उद्धव ठाकरे (Uddhav Thackeray) यांची भेट घेणार असल्याची शक्यता आहे. तसेच ते मंदिरात दर्शन घ्यायला जाणार आणि त्यानंतर ते भांडूप येथील आपल्या घरी जाणार असल्याची माहिती मिळत आहे.