महिला मुख्यमंत्री पदासाठी रश्मी ठाकरेही सज्ज; अब्दुल सत्तारांच्या विधानाने चर्चांना उधाण

मुंबई : महाराष्ट्रात जेव्हाही महिला मुख्यमंत्र्याची चर्चा होते, त्यावेळी सुप्रिया सुळे (Supriya Sule) यांच नाव आघाडीवर घेतले जाते. त्यात महाविकास आघाडीला अडीच वर्षे पुर्ण झाल्याने राजकीय वर्तुळात मुख्यमंत्री (Chief Minister) बदलाच्या चर्चाही होऊ लागल्या आहे. सुप्रिया सुळे यांच्या नावाची मुख्यमंत्री पदासाठी चर्चा सुरु असताना शिवसेनेने (Shivsena) याला उत्तर दिलं आहे. पुढील २५ वर्षे उद्धव ठाकरेच मुख्यमंत्री पदावक राहतील, त्यामुळे सुप्रिया सुळे पुढच्या २५ वर्षांनंतर मुख्यमंत्री होऊदेत असा खोचक टोला शिवसेनेचे नेते तथा महसूल राज्यमंत्री अब्दुल सत्तार यांनी लगावला आहे.

राष्ट्रवादीच्या खासदर सुप्रिया सुळे रविवारी उस्मानाबाद जिल्ह्याच्या दौऱ्यावर होत्या. या दौऱ्यात त्यांनी उस्मानाबादमध्ये आई तुळजा भवानीसह, गोरोबा काका मंदिरात जाऊन दर्शन घेतलं. आई तुळजा भवानीच्या दर्शनानंतर त्यांनी पत्रकरांशी संवाद साधला. यावेळी स्थानिक माध्यमांनी त्यांना ‘पुढचा मुख्यमंत्री राष्ट्रवादीचा होऊ दे आणि राष्ट्रवादीचा मुख्यमंत्री झाल्यास संपूर्ण पक्ष सोबत घेऊन नवस फेडायला येईल, असं साकडं घातलं.

याचवेळी त्यांना महाराष्ट्राला महिला मुख्यमंत्री कधी मिळणार असाही प्रश्न विचारण्यात आला. यावर “या प्रश्नाचे उत्तर द्यायला मी काही ज्योतिषी नाही, पण मी मुख्यमंत्री व्हावं की नाही, हे महाराष्ट्रातले लोक ठरवतील. ते मी कसं ठरवणार, असं सुप्रिया सुळे म्हणाल्या. या सर्व प्रसंगावर मंत्री अब्दुल सत्तार यांनी भाष्य केलं आहे.

महिला मुख्यमंत्रीच करायच्या असतील तर रश्मी ठाकरे त्यासाठी सज्ज आहेत. त्यांना राजकारणाचाही अभ्यास आहे. महाराष्ट्राच्या तमाम मंदिरांमध्ये शिवसेनेचा मुख्यमंत्री करण्यासाठी आधीच पूजा झाली आहे. मुख्यमंत्री उद्धव ठाकरे हे पुढील २५ वर्षे मुख्यमंत्री पदी राहतील. मग सुप्रिया सुळे मुख्यमंत्री कोणत्या तारखेला होणार याबद्दल मी बोलंण योग्य ठरणार नाही. त्यामुळे सुप्रिया सुळेंचा २५ वर्षानंतर नंबर लागावा, हीच ईश्वराकडे आमची प्रार्थना आहे,” अशी प्रतिक्रिया अब्दुल सत्तार यांनी दिली आहे.