Rajyasabha Election: महाविकास आघाडीचे शिष्टमंडळ देवेंद्र फडणवीसांना भेटणार

मुंबई : राज्यसभेच्या सहा जागांसाठी येत्या १० जून २०२२ रोजी निवडणूक (Rajyasabha Election) होत आहे. राज्यसभेच्या सहाव्या जागेसाठी चूरस वाढली आहे. पण विधिमंडळातील सध्याचं संख्याबळ पाहता सहाव्या जागेसाठी घोडेबाजार होण्याची शक्यताही वर्तवण्यात येत आहे. अशात राज्यसभा निवडणुकीत घोडेबाजार टाळण्यासाठी महाविकास आघडी शिष्टमंडळ देवेंद्र फडणवीस यांना भेटणार असल्याची माहिती समोर आली आहे.

राज्यसभेच्या सहाव्या जागेसाठी घोडेबाजार न होता ही निवडणूक बिनविरोध करण्यासाठी आज (३ जून) सकाळी दहा वाजता मंत्री छगन भुजबळ, खासदार अनिल देसाई, मंत्री सुनील केदार, कोल्हापूरचे पालकमंत्री सतेज पाटील देवेंद्र फडणवीस यांची भेट घेणार आहेत. दरम्यान राज्यसभा निवडणुकीतून उमेदवारी अर्ज मागे घेण्यासाठी आज शेवटचा दिवस आहे. त्यामुळे राज्यसभेच्या निवडणुकीचे चित्र आज दुपारी स्पष्ट होणार आहे.

राज्यसभेच्या एकूण सहा जागांसाठी ही निवडणूक होत आहे. पण यात ठाकरे सरकार आणि देवेंद्र फडणवीस या दोघांचीही प्रतिष्ठा पणाला लागली आहे. भाजपकडे पुरेसे संख्याबळ नसतानाही तिसरा उमेदवार देऊन शिवसेनेला धक्काच दिला. शिवसेनेने उमेदवारी दिलेले संजय पवार यांच्यासमोर निवडून येण्याचं आव्हान निर्माण झालं आहे.

भाजपकडून आज पीयूष गोयल अनिल बोंडे आणि धनंजय महाडिक यांनी राज्यसभेसाठी उमेदवारी अर्ज दाखल केला आहे. तर शिवसेनेकडून सहाव्या जागेसाठी कोल्हापूरच्या संजय पवार निवडणूकीच्या रिंगणात उभे आहेत.

एक खासदार निवडून येण्यासाठी ४२ मतांची गरज असते. राष्ट्रवादीने शिवसेनेला पाठिंबा दिला आहे. त्यामुळे राष्ट्रवादीची शिल्लक मते शिवसेनेला मिळणार आहेत. पण यात किंगमेकर ठरणार आहेत ते अपक्ष आणि छोट्या पक्षांचे आमदार. त्यामुळे ठाकरे सरकार फडणवीसांवर भारी पडतात की फडणवीस शिवसेनेचा करेक्ट कार्यक्रम करणार, हे आता राज्यातले २९ आमदारच ठरवणार आहेत.