परमबीरसिंहांचा ठावठिकाणा कळाला, ते परदेशात नसून भारतातच!

मुंबईचे माजी पोलीस आयुक्त परमबीरसिंह अडचणीत आले आहेत. त्यांचा ठावठिकाणा सर्वोच्च न्यायालयानेही विचारला होता.
परमबीरसिंहांचा ठावठिकाणा कळाला, ते परदेशात नसून भारतातच!
Param Bir Singh File Photo

नवी दिल्ली : राष्ट्रवादीचे नेते व माजी गृहमंत्री अनिल देशमुख (Anil Deshmukh) यांच्यावर शंभर कोटींच्या वसुलीचा आरोप करणारे मुंबईचे माजी पोलीस आयुक्त परमबीरसिंह (Param Bir Singh) अडचणीत आले आहेत. परमबीरसिंह यांचा ठावठिकाणा सर्वोच्च न्यायालयानेही विचारला होता. त्यावर ते भारतातच असल्याची माहिती त्यांच्या वकिलांनी न्यायालयाला आज दिली.

परमबीरसिंह यांना अटकेपासून संरक्षण मिळावे, यासाठी त्यांच्या वकिलांनी सर्वोच्च न्यायालयात धाव घेतली आहे. यावर सर्वोच्च न्यायालयाने मागील सुनावणीवेळी परमबीरसिंहांवर ताशेरे ओढले होते. न्यायालय म्हणाले होते की, परमबीरसिंह हे जगाच्या कोणत्या भागात सध्या आहेत? तुम्ही या देशात आहात की परदेशात? आधी तुमचा ठावठिकाणा सांगा. तुमचा व्यवस्थेवर किती अविश्वास आहे, हेच तुम्ही दाखवून देत आहात. तुम्ही पोलीस आयुक्त होता म्हणून तुम्हाला वेगळी वागणूक मिळणार नाही. केवळ अटकेपासून संरक्षण मिळाले तरच भारतात येणार, असे तुम्हाला म्हणायचे आहे का?

आजच्या सुनावणीवेळी परमबीरसिंह यांच्या वकिलांनी ते भारतातच असल्याची माहिती न्यायालयाला दिली. त्यांच्या जिवाला धोका असल्याने ते लपून बसल्याचेही वकिलांनी सांगितले. पुढील 48 तासांत केंद्रीय अन्वेषण विभागासमोर (सीबीआय) हजर राहण्याची कबुलीही त्यांच्या वतीने वकिलांनी दिली.

परमबीरसिंह यांच्यावर खंडणीचे चार गुन्हे दाखल आहेत. ते परदेशात पळून गेल्याची चर्चा सुरू होती. खंडणी प्रकरणी दाखल गुन्ह्यात परमबीरसिंह यांच्यासह विनयसिंह आणि रियाज भाटी यांना मुंबईतील न्यायालयाने फरारी गुन्हेगार घोषित केले. गोरेगाव पोलिसांकडे हा गुन्हा दाखल आहे. हे आरोपी फरार असून, ते सापडत नसल्याने त्यांना फरारी गुन्हेगार घोषित करावे, अशी मागणी पोलिसांनी न्यायालयाकडे केली होती. यानुसार न्यायालयाने परमबीरसिंह यांच्यासह तिघांना दणका दिला आहे.

आता मुंबई पोलीस परमबीरसिंह यांच्या निवासस्थानावर ते फरार गुन्हेगार असल्याची नोटीस लावू शकतात. त्यांना हजर होण्यासाठी 30 दिवसांचा कालावधी असेल. ते 30 दिवसांत हजर न झाल्यास त्यांच्या आर्थिक नाड्या आवळण्यास मुंबई पोलीस सुरवात करतील. यात परमबीरसिंह यांच्या मालमत्ताही जप्त केल्या जाऊ शकतात.

Param Bir Singh
पंतप्रधान मोदींना जमलं नाही ते मुख्यमंत्र्यांनी करून दाखवलं!

मुंबईतील एस्पेलेनेड न्यायालयाने खंडणी प्रकरणात परमबीरसिंह यांच्यासह तिघांविरोधात मागील आठवड्यात अजामीनपात्र अटक वॉरंट बजावले आहे. परमबीरसिंह यांच्यासोबतच विनयसिंह आणि रियाज भाटी यांच्याविरोधात ही कारवाई करण्यात आली आहे. परमबीरसिंह हे सापडत नसून गुन्हे शाखा त्यांचा शोध घेत आहे. गुन्हे शाखेकडून परमबीरसिंह यांच्या विरोधात दाखल प्रकरणाचा तपास सुरू आहे. याच प्रकरणात छोटा शकीलचा हस्तक रियाज भाटी हासुद्धा आरोपी आहे . सध्या तो फरार आहे.

Param Bir Singh
अखेर ठरलं! 15 नवीन चेहऱ्यांना मंत्रिपदाची लॉटरी

परमबीरससिंह यांच्या विरोधात एकूण तीन अटक वॉरंट बजावण्यात आली आहेत. परमबीरसिंह यांच्यावर आतापर्यंत अनेक गंभीर गुन्हे नोंदवण्यात आले आहेत. या प्रकरणांमध्ये परमबीरसिंग अद्याप पोलिसांच्या हाती लागलेले नाहीत. त्यांच्याविरोधात लुकआऊट नोटीसही यापूर्वी काढण्यात आली होती. ते परदेशात पळून गेल्याची शक्यताही व्यक्त केली जात आहे. त्यामुळे अखेर मुंबई पोलिसांनी न्यायालयाचा दरवाजा ठोठावला होता.

Related Stories

No stories found.
Sarkarnama
www.sarkarnama.in