Ashutosh Kale On NCP Crisis : भविष्यात राष्ट्रवादी काँग्रेस एकसंध राहील; अजित पवार गटाचे आमदार आशुतोष काळेंचा विश्वास!

राजेंद्र त्रिमुखे :

Ahmednagar News : नवनिर्वाचित उपमुख्यमंत्री अजित पवार (Ajit Pawar) यांनी राष्ट्रवादी काँग्रेसचा मोठा गट घेऊन शिंदे-फडणवीस सरकारमध्ये सहभागी झाले. यादरम्यान नगर जिल्ह्यातील कोपरगावचे राष्ट्रवादी काँग्रेसचे आमदार अशितोष काळे (Ashutosh Kale) हे मात्र आपल्या परिवारासह विदेशात होते. मात्र राज्यात परत येताच त्यांनी अजित पवार यांची भेट घेत, त्यांना आपला पाठिंबा जाहीर केला. असे असले तरी आशुतोष काळे यांनी राष्ट्रवादी काँग्रेस पक्ष (NCP Crisis) भविष्यात एकसंध होईल, अशी आशा व्यक्त केली आहे. (Latest Marathi News)

नगर जिल्ह्यामध्ये राष्ट्रवादी काँग्रेसचे एकूण सहा आमदार आहेत. यामध्ये संग्राम जगताप, नीलेश लंके, किरण लहामटे हे तीन आमदार यापूर्वीच अजित पवार यांच्या सोबत गेले आहेत. तर दुसरीकडे रोहित पवार आणि प्राजक्त तनपुरे यांनी शरद पवार यांच्या गटामध्येच राहणे पसंत केले. दरम्यान विदेशातून आलेले आशुतोष काळे यांनीही अजित पवार गटामध्ये उडी मारली.

आशुतोष काळे हे शरद पवारांचे विश्वासू आणि शेवगावचे माजी आमदार चंद्रशेखर घुले यांचे जावई आहेत. तसेच जयंत पाटील हे चंद्रशेखर घुले यांच्या मोठ्या बंधूंचे मेहुणे आहेत. त्यामुळे एकूणच आशुतोष काळे जयंत पाटील आणि चंद्रशेखर घुले यांच्या नातेसंबंधातून शरद पवार गटात राहतील अशी शक्यता वर्तवली जात होती, मात्र त्यांनी अजित पवार यांच्या सोबत जाणे पसंत केले आहे.

दरम्यान आशुतोष काळे यांनी अजित पवार यांच्यासोबत जाण्याचा घेतलेल्या निर्णयाबद्दल आपलं मत व्यक्त करताना शरद पवार आणि अजित पवार यांच्याप्रति काळे परिवाराची निष्ठा असल्याचे सांगितले. सद्य परिस्थिती पाहता अजित पवार यांच्यासोबत जाणे योग्य राहील, असं वाटल्याने माझा निर्णय घेतलेला आहे, मात्र त्याचबरोबर भविष्यामध्ये राष्ट्रवादी पक्षाचे दोन्ही गट एकत्रित येतील आणि पक्ष एकसंध राहील असा मला विश्वास वाटतो, अशी आशा आशुतोष काळे यांनी व्यक्त केली आहे.