Drugs-on-cruise case : मलिकांनी वानखेडेंवर केलेले आरोप खरे ठरत आहेत..; रोहित पवार म्हणतात..

Rohit Pawar on Sameer Wankhede : एनसीबीचे (नार्को टेस्ट कंट्रोल ब्यूरो) मुंबई विभागाचे माजी संचालक समीर वानखेडे (Sameer Wankhede) यांची शनिवारी केंद्रीय गुन्हे अन्वेषण विभागाने (सीबीआय) पाच तासांहून अधिक काळ चौकशी केली. आजही समीर वानखेडे यांची चौकशी सुरु आहे. त्यासाठी दिल्ली येथून सीबीआयचे विशेष पथक आले आहे.

समीर वानखेडे यांनी त्यांच्यावरील आरोप फेटाळून लावले आहेत. त्यांना आज अटक होण्याची शक्यता नाकारता येत नाही. वानखेडे यांच्या चौकशीवरुन राष्ट्रवादी काँग्रेसचे नेते, आमदार रोहित पवार यांनी वानखेडेंवर टीका केली आहे.

राष्ट्रवादी काँग्रेसचे माजी मंत्री नवाब मलिक यांनी वानखेडे यांच्या कारवाईवर संशय व्यक्त केला होता. त्यांच्या तपासावर प्रश्नचिन्ह निर्माण केले होते.त्यांची आठवण रोहित पवारांनी यानिमिताने करुन दिली आहे.

मुंबईतील बीकेसीमधील कार्यालयात सीबीआयकडून वानखेडेचा जबाब नोंदविण्याचे काम सुरु आहे. चौकशीला समोरे जाताना वानखेडे यांनी ‘सत्यमेव जयते’ अशी प्रतिक्रिया दिली आहे. शनिवारी चौकशी झाल्यानंतर त्यांनी सिद्धीविनायकाचे दर्शन घेतलं होते, आपल्याला न्याय मिळेल, असे त्यांनी सांगितले होते.

वानखेडे यांच्या चौकशीत रोज नवे खुलासे बाहेर येत आहेत. यावर रोहित पवार यांनी लक्ष वेधलं आहे. ते म्हणाले, "नवाब मलिक यांनी सांगितलेल्या सगळ्या गोष्टी आता वानखेडे यांच्या बाबतीत सत्य होताना पाहायला मिळत आहेत. केंद्र सरकारच्या विरोधात मलिक बोलत असल्याचा आरोप करुन सरकारने त्यांना तुरुंगात टाकले,"

"अनेक प्रकरणात भाजपचे आरोप यापूर्वी खोटे ठरले आहेत. भाजपच्या नेत्यांना राजकारणाशिवाय काही कळत नाही हे जनतेला कळलं आहे," असे पवार म्हणाले. 'राजकारणासाठी लोकांना फोडण्यासाठी भाजपकडून पैशांचा वापर केला जात आहे. हे पैसे कुठून येतात याचा अंदाज जनतेला येत आहे,' असे रोहित पवार म्हणाले.

समीर वानखेडे आज सलग दुसऱ्या दिवशी CBI कार्यालयात दाखल झाले आहे. काल समीर वानखेडे यांची सीबीआय कडून पाच तास चौकशी करण्यात आली होती. आर्यन खान कॉर्डिलिया क्रूझ ड्रग्स प्रकरणात खंडणी मगितल्याचा आरोप हा समीर वानखेडे यांच्यावर करण्यात आला आहे.

(Edited By : Mangesh Mahale)