Sanjay Raut : अमृता वहिनी गप्प का ? ; तेव्हाच बाबा रामदेवांच्या कानाखाली का दिली नाही..राऊत संतापले

Sanjay Raut : योगगुरू रामदेवबाबा यांच्या कथित वक्तव्यावरून वाद निर्माण झाला आहे. ठाण्यात झालेल्या योग शिबिरात त्यांनी महिलांविषयी वादग्रस्त विधान केल्याने नव्या वादाला तोंड फुटलं आहे. या कार्यक्रमास उपमुख्यमंत्री देवेंद्र फडणवीस यांच्या पत्नी अमृता फडणवीस उपस्थित होत्या. (mp Sanjay Raut latest news)

ठाकरे गटाचे प्रवक्ते, खासदार संजय राऊत यांनी अमृता फडणवीस यांच्या भूमिकेबाबत संताप व्यक्त केला आहे. राऊत शनिवारी माध्यमांशी बोलत होते. "बाबा रामदेव महिलांबाबत असे विधान करीत असताना अमृता वहिनी त्या ठिकाणी उपस्थित होत्या. त्यांनी तेव्हाच बाबा रामदेव यांच्या कानाखाली सणकन ओढली पाहिजे होती. त्या गप्प का ? " असा सवाल राऊतांनी उपस्थित केला आहे.

"महिला साडी नेसल्यावर, सलवार कुर्त्यावरही चांगल्या दिसतात. काही नाही घातलं तरी चांगल्या दिसतात," असे विधान बाबा रामदेव यांनी काल (शुक्रवारी) केलं आहे. या विधानानंतर बाबा रामदेव यांच्यावर सर्व स्तरातून टीका केली जात आहे. बाबा रामदेव यांच्या वक्तव्यावरून राष्ट्रवादी काँग्रेसच्या नेत्या रूपाली-पाटील ठोंबरे यांनी काल संताप व्यक्त केला आहे.

बाबा रामदेव यांच्यावर या प्रकरणी महिला आयोगाने रामदेव बाबांना नोटिस पाठवली आहे, तीन दिवसात याबाबत खुलासा करावा, असे आयोगाच्या अध्यक्षा रुपाली चाकणकर यांनी या नोटिसमध्ये म्हटलं आहे.

आपण केलेल्या विधानामुळे महिलांची प्रतिष्ठा आणि सन्मान दुखावला गेला आहे, समाजमाध्यमांवर आपल्या या विधानावर तीव्र प्रतिक्रिया व्यक्त केल्या जात आहेत. आपल्या विरोधात याबाबत तक्रारी आल्या आहेत, याबाबत आपण तीन दिवसात स्पष्टीकरण द्यावे, असे महिला आयोगाने बाबा रामदेव यांना पाठवलेल्या नोटिशीमध्ये म्हटलं आहे. बाबा रामदेव यांनी महिलांबाबत केलेल्या या विधानाची गंभीर दखल आयोगाने घेतली आहे.

ठाण्यातील हायलँड मैदानात रामदेव बाबा यांनी शुक्रवारी योगाचे धडे दिले. यावेळीच त्यांनी हे वक्तव्य केले. या कार्यक्रमाला मुख्यमंत्री एकनाथ शिंदे यांचे पुत्र श्रीकांत शिंदे, उपमुख्यमंत्री देवेंद्र फडणवीस यांच्या पत्नी अमृता फडणवीस उपस्थित होत्या. यावेळी दीपाली सय्यद, आमदार रवी राणा यांनीही मंचावर हजेरी लावली.