Gajanan Kale On Sushma Andhare: सुषमा अंधारेंवर टीका करताना मनसे नेत्याची जीभ घसरली; म्हणाले, ''ही काळी मांजर...''

Maharashtra Politics : ठाकरे गटाच्या नेत्या सुषमा अंधारे भाजप, शिंदे गट आणि मनसेतील नेतेमंडळींवर टीका करण्याची एकही संधी सोडत नाही. आता मनसेकडूनही अंधारे यांच्यावर टीका करण्यात आली आहे. पण ही टीका करताना मनसे नेत्याची जीभ घसरली आहे. मनसे प्रवक्ते गजानन काळे यांनी सुषमा अंधारेंना थेट काळी मांजर म्हटल्यानं राजकीय वातावरण तापण्याची शक्यता आहे.

महाराष्ट्र नवनिर्माण सेनेच्या कार्यक्रमामध्ये गजानन काळे उपस्थित होते. यावेळी त्यांनी उद्धव ठाकरे, आदित्य ठाकरे, सुषमा अंधारे, खासदार संजय राऊत दीपाली सय्यद यांच्यावर बोचरी टीका केली आहे. काळे यांनी अंधारेंवर निशाणा साधताना ती काळी मांजर सारखं आडवी जाते अशी टीका केली आहे. तसेच यावेळी त्यांनी संजय राऊत असो की सुषमा अंधारे असो आता हा पक्ष संपणारच आहे आणि या पक्षात आता उरलेसुरले दोघं बापलेकच राहणार असल्याचे दिसून येणार आहे अशी बोचरी टीकाही गजानन काळे(Gajanan Kale) यांनी केली आहे.

मुख्यमंत्र्यांच्या काळात कुठल्या क्षेत्रात घोटाळा झाला नाही असं नाही...

कोरोना काळात अडीच वर्षे घरात बसून, फेसबूक ऑनलाईन करून देशातील सर्वोत्तम मुख्यमंत्री पदाचा पुरस्कार घेतलेल्या मुख्यमंत्र्यांच्या काळात कुठला क्षेत्रात घोटाळा झाला नाही असं नाही. सगळ्या क्षेत्रात यांचा घोटाळा अगदी उंदीर मारण्यातही यांनी घोटाळा करत ठाकरे गटावर त्यांनी जोरदार हल्लाबोल केला.

बारामतीची चाटूगिरी करून संजय राऊत यांनी राजकीय प्रवास केला आहे. राऊत हे महाविकास आघाडीच्या आधी काँग्रेस राष्ट्रवादीवर प्रचंड टीका करत होते. याचवेळी ते दिल्लीत जाऊन मात्र शरद पवार यांच्याच बंगल्यावर जाऊन भेटत घेत होते. शरद पवारांनी टीका करण्यासाठी महाविकास आघाडीमध्ये खासदार संजय राऊत ठेवले होते. आता त्यांना शांत बसवून या असा हल्लाबोल देखील काळे यांनी संजय राऊतांवर केला आहे.

सुषमा अंधारे यांना राष्ट्रवादीचे पार्सल तर दीपाली सय्यद यांना सय्यद बंडा म्हणत डिवचलं आहे. यामुळे आगामी काळात गजानन काळे यांच्या टीकेला राष्ट्रवादी व ठाकरे यांच्यातील वाद पेटण्याची शक्यता आहे.