Shiv Sena MLA Disqualification : आमदार अपात्रता प्रकरण आणखी लांबणीवर? आता दोन आठवड्यांनंतर सुनावणी..

Mumbai News : शिवसेना आमदारांच्या अपात्रतेचे प्रकरण सर्वोच्च न्यायालयाने विधानसभा अध्यक्ष राहुल नार्वेकर यांच्याकडे सोपवले आहे. त्यानुसार अध्यक्षांनी शिवसेनेच्या सर्व आमदारांना नोटीस बजावत आपले म्हणणे मांडण्याची सूचना केली होती. विधानसभा अध्यक्षांनी शिवसेनेच्या घटनेचा अभ्यास केल्यानंतर आता या प्रकरणी आज सुनावणी घेतली. या सुनावणीत दोन्ही गटांना एकमेकांची कागदपत्रे उपलब्ध व्हावीत, यासाठी दोन आठवड्यांची वेळ दिली आहे. (Latest Marathi News)

आज (गुरुवारी) दुपारी बारा वाजता सुनावणीला सुरुवात झाली होती. विधिमंडळाच्या मध्यवर्ती सभागृहात ही सुनावणीची प्रक्रिया घेण्यात आली. शिवसेना ठाकरे गटाचे नेते सुनील प्रभू यांनी दाखल केलेली कागदपत्रे आम्हाला मिळावीत, अशी मागणी शिंदे गटाचे वकील अनिल सिंग यांनी केली. या मागणीनुसार आता दोन्ही गटांना दोन आठवड्यांची वेळ देण्यात आली आहे.

लेखी उत्तर सादर करण्यासाठी शिंदे गटाच्या आमदारांना मुदतवाढ देण्यात आलेली आहे. शिंदे गटाची ही महत्त्वपूर्ण मागणी पूर्ण झाली आहे. तसेच, दोन्ही गटांना एकमेकांची कागदपत्रे मिळावीत यासाठी दोन आठवड्यांची वेळ देण्यात आली आहे. विधानसभा अध्यक्ष राहुल नार्वेकर यांनी ही मुदतवाढ दिली आहे.

राहुल नार्वेकरांनी शिवसेना शिंदे गटाच्या 40 आणि ठाकरे गटाच्या 14 आमदारांना सुनावणीसाठी हजर राहण्याचे समन्स बजावले होते. शिवसेना ठाकरे गटाच्या 14 आमदारांनी विधानसभा अध्यक्षांकडे 500 पानी लेखी म्हणणं मांडले आहे.

सुनावणीवेळी सुप्रीम कोर्टातले ज्येष्ठ वकील देवदत्त कामत आणि वकील असिम सरोदे यांनी ठाकरे गटाकडून युक्तिवाद केला आहे, तर शिंदे गटाकडून वकील अनिल सिंग यांनी युक्तिवाद केला. तब्बल ३४ याचिकांवर विधानसभा अध्यक्षांना सुनावणी करायची आहे. प्रत्येक याचिकेची वेगळी सुनावणी केली जाणार आहे. मात्र, लेखी उत्तर दाखल करण्यासाठी आणि कागदपत्रे उपलब्ध होण्यासाठी अध्यक्षांनी आता दोन आठवड्यांची वेळ दिली आहे. य़ामुळे आज अंतिम सुनावणी कधी होणार याबबत अनिश्चतता आहे.

(Edited By - Chetan Zadpe)