नाशिक अनाथाश्रमातील मुलींच्या लैंगिक छळ प्रकरणी मंत्री लोढांनी सचिवांना दिला सात दिवसांचा अल्टिमेटम

मुंबई : दिल्ली येथील श्रद्धा वालकरच्या हत्येनंतर संपूर्ण देशभर संतापाचे वातावरण असतांना नाशिकमध्ये देखील संतापजनक घटना समोर आली आहे. नाशिक येथील अनाथ आश्रमाच्या संचालकाने आश्रमातील सहा अल्पवयीन मुलींचा लैंगिक छळ केल्याची घटना घडली आहे.

दरम्यान या प्रकरणाची महिला व बालविकास मंत्री मंगलप्रभात लोढा (Mangal Prabhat Lodha) यांनी दखल घेतली असून या प्रकरणीची चौकशी करून अहवाल देण्याचा आदेश खात्याच्या प्रधान सचिवांना दिला आहे. (MangalPrabhat Lodha, Nashik Crime Latest News)

या संदर्भातील बातम्या प्रसारमाध्यमांमध्ये चांगल्याच प्रसिद्ध झाल्या होत्या. लोढा यांनी या प्रकरणाची गंभीरतेने दखल घेत सखोल चौकशी करण्यासाठी समिती नेमण्यास सचिवांना सांगण्यात आले आहे. या प्रकरणाचा सात दिवसांत चौकशीचा अहवाल सादर करण्याचे निर्देश लोढा यांनी दिले आहेत.

दरम्यान, श्रद्धा वालकरच्या हत्येनंतर संपूर्ण देशभर संतापाचे वातावरण असतांना नाशिकमध्ये अनाथ आश्रम चालवणाऱ्या संचालकानेच एका अल्पवयीन मुलीवर अत्याचार केल्याची घटना घडल्याने राज्यभरात आणि सोशल मिडियावरून नागरिक संताप व्यक्त करत आहे. या पीडित अल्पवयीन मुलीने म्हसरूळ पोलीस ठाण्यात दिलेल्या तक्रारीवरुन पॉस्को कायद्यानंतर्गत गुन्हा दाखल करण्यात आला आहे. आता या घटनेची गंभीर दखल मंत्री लोढांनी घेतली असून त्यांनी आपल्या खात्याच्या प्रधान सचिवांना या प्रकरणाचा अहवाल सात दिवसात सादर करण्याचे निर्देश दिले आहेत.