Maratha Reservation : जरांगे पाटलांची मोठी मागणी होणार पूर्ण?; राज्य सरकारच्या हालचालींना वेग, फडणवीस राज्यपालांना भेटले

Maratha Reservation Latest News : मुख्यमंत्री एकनाथ शिंदे यांनी काल राज्यपाल रमेश बैस यांची भेट घेतली होती, तर आज उपमुख्यमंत्री देवेंद्र फडणवीस यांनी राज्यपालांची भेट घेतली आहे. या भेटीत मराठा आरक्षणाबाबत विधिमंडळाचं विशेष अधिवेशन बोलवावं, याबाबत चर्चा झाल्याचं बोललं जात आहे. विशेष अधिवेशन घेण्यासाठी राज्य सरकारच्या हालचाली सुरू असल्याचं सांगण्यात येत आहे, पण राज्य सरकारकडून अद्याप याबाबत अधिकृत माहिती देण्यात आलेली नाही.

मराठा आरक्षणाच्या मागणीसाठी राज्यात मराठा समाज आणि संघटना रस्त्यावर उतरल्या आहेत. ठिकठिकाणी रास्ता रोको आणि आंदोलनं केली जात आहेत. या पार्श्वभूमीवर राज्यपाल निर्णय काय घेणार? याकडे सर्वांचं लक्ष लागलं आहे. विरोधी पक्षांच्या नेत्यांनीही काल राज्यपाल यांची भेट घेतली होती. त्यांनी मराठा आरक्षणासाठी राज्य विधिमंडळाचं विशेष अधिवेशन बोलवण्याची मागणी राज्यपालांकडे केली होती. विजय वडेट्टीवार, सुप्रिया सुळे, विचारे, तायवाडेंनी ही मागणी केली होती.

मराठा आरक्षणासाठी उपोषणाला बसलेले मनोज जरांगे पाटील यांनीही विधिमंडळाचं विशेष अधिवेशन घ्यावं, अशी मागणी केली आहे. राज्यातील आमदार आणि अनेक नेत्यांनी ही मागणी केली आहे. या पार्श्वभूमीवर राज्यपाल रमेश बैस यांनी राज्यातील संपूर्ण परिस्थितीचा आढावा घेतला आहे. आज संध्याकाळपर्यंत राज्यपालांकडून काही महत्त्वाच्या सूचना या राज्य सरकारला करण्यात येतील. आणि यासंदर्भातली अधिसूचनाही लवकरच काढण्यात येईल, असं बोललं जात आहे.

मुख्यमंत्र्यांनी बोलावली सर्वपक्षीय बैठक

दरम्यान, मराठा आरक्षणावर मुख्यमंत्री एकनाथ शिंदे यांनी बोलावली सर्वपक्षीय बैठक बोलावली आहे. मुंबईत उद्या सकाळी १०.३० वाजता सह्याद्री अतिथिगृहावर ही बैठक होणार आहे. दुसरीकडे, मराठा आरक्षणाच्या मागणीसाठी तीन आमदारांनी मंत्रालयाबाहेर लाक्षणिक उपोषण सुरू केलं आहे. नीलेश लंके, कैलास पाटील आणि राजू नवघरे यांनी उपोषण सुरू केलं आहे.